Tuesday, July 23, 2019

විදුලි පංකා හුටපටය හා නැව ගිනි තැබිම. - සයුරේ දසවසක් - 14


  

           නෞකාව ගාල්ල වරායට සැපත්විමත් සමගම මාහට එහි හිටපු එකම හිතවතාවු කඩ්ඩාගේ පුහුණු කාලය අවසන්විය.  කඞ්ඩා නැවෙන් සයින් ඔෆ් වි (Sign off) යාමෙන් පසුව ඔහු වෙනුවට නැවට එක්වුයේ එකනායක නම්වු ගාල්ලේ බද්දේගම ප‍්‍රදේශයේ පදිංචි තරුණයෙකුය. ඔහු අපගේ පුහුනු පාසලේ පුහුණුවන්නෙකුවු අතර හේ මට වඩා වසරකින් කනිෂ්ඨ විය. සැබැවින්ම එකනායක නිහතමානි චරිතයක්වු අතර අප දෙදෙනා ඉතා සහයෝගයෙන් අපගේ වැඩකටයුතු කරගෙන ගියෙමු. ති‍්‍රකුණාමලයේ සිට උතුරට යාත‍්‍රා කරද්දි නැවේ ජල සැපයුම සිමා කරවයි. ඒ උතුරේදි නෞකාවට ජලය පසයා ගන්නට හැකියාවක් නොමැති බැවිනි. එවන් දිනවල උදෑසන ජල සැපයුම ලැබෙන විට දොලහ හතර සේවා මුරයේ යෙදෙන මා වෙනුවෙන් බාල්දියකට වතුර පුරවා ගෙනවිත් තබන්නට තරම් ඔහු කාරුණිකවුනි.

         
මෙච්චර තරම් වත් හොද කැබිනයක් නොවිය

      කාපෙන්ටරයා ගේ වැඩ පිලිවෙල නිසා කැබින් කාමර පිලිසකර කිරිම සිදුවුයේ ඉතාමත් මන්දගාමිවය. අනෙක් කාමර වල ගැලවු පැනලින් හා සුන්බුන් වලින් පිරුනු කාමරයක් අපගේ කැබින් තිබු තට්ටුවේ පොට් සයිඩ් හි කෙලවරේ තිබුනි. කඩ්ඩා හා මා සිටි කැබින් කාමරයෙන් අපට පිටමංවි  කෙලවරේ කාමරයට යන ලෙසින් නෞකාවේ වැඩි බලයක් ලගාකරගෙන සිටි බක සිල්වා ඇතුලු එබි කණ්ඩායම බලකරන්නට විය. සුන්බුන් වලින් හා දුහුවිල්ලෙන් පිරුනු කාමරයකට යන්නට මා අදිමදි කර බලහත්කාරයෙන් එහි රැදි සිටන්නට විමි. අවසානයේ ඔවුන් ජයගත්තේ ප‍්‍රධාන නිලධාරිවරයාට කියමින්ය. ඔහුගේ අණට කිකරුවනවා හැරෙන්ට වෙන කලයුතු දෙයක් නොමැති වුනි. ඒ අපගේ එන්ජින් අංශයේ එංජිනේරු නිලධාරින් ගේ බියසුලු කම බැවිනි. එකනායකත් මාත් සුන්බුන් ඉවත් කර කැබින් කාමරය නිදාගත හැකි පිලිවෙලට සකසා ගත්තෙමු. එහෙත් එහි බිම සිමෙන්ති නොවිය. සිමෙන්ති ඉවත්කර තිබුනේ දිරාගිය පොලෝ තට්ටුවේ යකඩ තහඩු කපා ඉවත් කර අලුතින් අතුරන්නටය. අපගේ කාමරයට යටින් වුයේ එන්ජින් කාමරයේ ජෙනරේටර් තිබු ඉසව්වය. ඉන්ජින් කාමරයෙන් නැගෙනා අධික තාපය පොලවේ තහඩුව රත් කරමින් කාමරයේ පොරනුවක් සේ ගිනියම් වන්නට ගනියි. ඩෙක් අංශයේ අයගේ කැබින් වලට සිමෙන්ති ඇතිරුවත් අපගේ කාමරය නොසලකා හැරුනි. එකතායකත් සමගින් ගොස් බිමට සිමෙන්ති අතුරා දෙන මෙන් ඉල්ලා සිටියත් ප‍්‍රධාන නිලධාරියා එම ඉල්ලිම ඉටුකලේ නැත. නෞකාවේ හදිසි සිදුරක් ඇතිවුවහොත් වසා දමන්නට සිමෙන්ති අත්‍යාවශ කාරනාවක් බැවින් තිබෙන සිමෙන්ති බිමට දමන්නට බැරි බව කියමින් ඔහු පිටවි ගියේය.  

        කැබින් කාමරයේ එක වාසියක් වුයේ එහි තිබු පෝට් හෝලය විවර කල හැකි විමයි. එයත් කල හැකි වන්නේ බඩු පටවා නොමැතිව නැව හිස්ව තිබෙන විටදි පමණි. නින්ද අතරමගදි අවදිවන්නට සිදුවන්නේ දහඩියෙන් පෙගි ගිය අතරතුරේදීය. කාමරය සිසිල් කරන්නට මා යොදාගත් එක උපක‍්‍රමයක් වුයේ නිදා ගන්නට පෙර කැබින් කාමරයේ පොලවට වතුර බාල්දියක් පමණ හැලිමයි.





පැරනි ඉන්දියානු විදුලි පංකාවන් මෙතරම්වත් හොද නිමාවකින් යුතු නොවුනි.

        පහල තට්ටුවේ තිබු එන්ජින් කාමරයෙන් නැගෙන රස්නයෙන් ඊට ඉහළින් තිබු අපගේ කැබින් කාමර දැඩි රස්නයකින් යුක්ත විය. වායුසමිකරන යන්ත‍්‍රයන්ගෙන් සිසිල් වායු දහරා ගලා එමක් නොවුන මෙහි සෑම කැබිනයකම තිබුයේ ඉන්දියානු මේස විදුලිපංකාය. මමත් කඩ්ඩාත් සිටි කැබින් කාමරයේ විදුලි පංකාවක් තිබුනි. කැබින් කාමර මාරුවේදි මේ  විදුලි පංකාවද ගලවාගෙන ගොස් අපට ලැබුනු අලුත් කැබින් කාමරයේ සවිකරගතිමු. දහඩියෙන් පෙගි අසීරුවෙන් නිදියන රාති‍්‍රයන් ඉන් පසු නිමාවීය. එහෙත් එය සතියක් එකාමාරකට වඩා තබාගැනිමට නොහැකි වුයේ බක සිල්වා අප කැබිනයේ තිබූ මේස විදුලි පංකාව දුටුව පසුවය. ඉන් දින දෙකකට පසු එයට අයිතිවාසිකම් කීමට ඔහු ආවේය. එය ඔහුට යළි දීමට මාගේ කිසිදු කැමැත්තක් නොවුන අතර ඔහු එය ඔහුගේ කැබිනයේ පංකාව බව පවසමින් හොදින් හෝ නරකින් ගන්නා බව වහසිබස් පවසන්නට විය. මාගේ පැත්තට සිටියේ නැවට අළුතින් ආ  එකනායක පමණි. අලුතින් ආ ආධුනිකයෙකුවු එකනායකගෙන් වැඩි සහයෝගයක් මාහට නොලැබුනු අතර බක සිල්වාගේ සහයට තම ඩෙක් අංශයේ සියල්ලන්ම එකතුවිය. අවසානයේ කැබිනයේ තියෙන විදුලි පංකාවක් වෙනත් කැබිනයකට රැගෙන යාම නිති විරෝධි වැඩක් ලෙස  පවසිමින් ඔහුගේ විදුලි පංකාව බාරදෙන ලෙසින් ප‍්‍රධාන නිලධාරිතුමාගෙන් අණක්  ලැබින. ඔහු ජයග‍්‍රාහි ලෙසින් පංකාව අත්පත් කරගත්තේය. එහෙත් එය කඩ්ඩාත් මාත් පෙර සිටි කැබිනයට රැගෙන යාමක් නොවිය. බක සිල්වා සිටි කැබිනයේ විදුලි පංකාවක් තිබුනු අතර මාගෙන් බලහත්කාරයෙන් ලබාගත් එම විදුලිපංකාවද එහි සවිකරවාගත්තේය. කැබිනයේ විදුලිපංකාවක් නොමැතිව අධික රස්නෙන් දුක්විදින අප වෙනුවෙන් ඉන්ජිනේරුවරුන්ගෙන් හෝ අනෙකුත් එන්ජින් අංශයේ කිසිවෙකුගෙන් වචනයකින් වත් සහයෝගයක් නොලැබින.

     
             මෙම විදුලි පංකා හුටපටයෙන් පසුව ඩෙක් අංශයේ බොහෝ දෙනෙකුගේ සුහදතාවය අඩුවිය. ඩෙක් අංශයේ සියල්ලන්ම පාහේ කතා බහ කිරිමෙන් වලක්වාලන්නට බක සිල්වාට හැකිවුනි. විදුලි පංකාව ආපසු දුන්නත් ලේසියෙන් පරාජය බාරගැනිමට මාගේ සිත පිලිගත්තේ නැත. මට නැත්නම් උඹටත් නැති කරන්නම් මාගේ සිත මොරගාන්නට විනි. බක සිල්වාට නොදැනි පංකාව විනාස කිරිමට පුලුවන් විධි ගැන සිතා බලන්නට විමි. මෝටරය මතට ජලය හෝ මුහුදු ජලය වත්කර එය කි‍්‍රයාත්මක කිරිම හෝ කි‍්‍රයාත්මක පංකාවේ පෙත්ත හිරවන්නට යකඩ කූරු කැබැල්ලක් සිර කිරිමෙන් මෝටරය අක‍්‍රිය කිරිම සැලසුමේ ක‍්‍රම දෙක වුනි. එහෙත් කවුරුත් නොමැති අවස්ථාවක් එනතෙක් හිද කැබින් කාමරයට පැන එය කරන්න කල්යල් බලද්දි මාගේ සැලසුම අකුලාගන්නට සිදුවුයේය. ඒ ටික දිනකින් කැබින් කාමර අගුලුලෑමට හැකිවන ලෙසින් කාපෙන්ටරයා සියළු කමරවලට නව අගුලු සැකසූ බැවිනි.  එහෙත් යටිහිතේ බක සිල්වාගෙන් පලිගැනිම අත්හැරුනේ නැත.

      පෑස්සුම් ශිල්පියා ලෙසින් වැඩ කල රංජිත් අයියා හෙවත් කොට රංජි නැවෙන් බැස ගිය පසුව ආ වෙල්ඩරයාද විදුලි පංකා ආරවුලෙන් පසුව එකතුවුයේ බක සිල්වාගේ සමාගමටය. රංජි අයියා සමගින් සිටි අනෙක් පෑස්සුම්කරුවු චමින්දද ඔහු හා එක්වුනි. නැවේ වැඩිම සේවකයින් පිරිසක් ඇත්තේ ඩෙක් අංශයට බැවින් මාගේ පැත්තට සිටියේ එකනායක පමණි. කිසිවෙකුගෙත් උදව් උපකාරයක් හෝ හව්හරණක් නොමැති අසීරු අවස්ථාව ගනනාවකට මුහුණ පාන්නට සිදුවෙමින් පවතින නිරතුරුවම සිතට නැගෙන්නට විය. මෙතෙක් කලක් මිතුරන් සේ එකට සිටි අයගෙන් වන නොසලකා හැරිම් මදිපුංචිකම් කෙනහිලිකම් දිගින් දිගටම සිදුවන්නට විය. කොහේවත් සිටි වෙල්ඩරයා බක සිල්වාගේ පැත්තට ගෙන පුලුවන් තරම් අරියාදුකරන්නට පටන්ගැනිම මාගේ කෝපය තී‍්‍රව කරවීය. බක සිල්වාගෙන් හා අනෙක් උන්ගෙන් පලිගන්නට අවස්ථාවක් එනතෙක් බලාහිදින්නට විමි. 

ගබඩා කාමරයක්

  
       අපගේ කැබින් කාමර පිහිටා තිබුනේ  ප‍්‍රධාන තට්ටුවට යටිනි. එයට තරප්පු පෙලින් බැසිමෙන් ඉංග‍්‍රීසි " යු " ( "U") අකුරේ හැඩයට ඇලිවේ
(Alleyway) එක බෙදි දෙපස කැබින් කාමර පිහිටා තිබුනි. යු අකුරේ මැද වුයේ එන්ජින් කාමරයයි. එන්ජින් අංශයේ ගබඩාවක් ලෙසින් යොදාගන්නා කැබින් කාමරයක් මේ තට්ටුවේ ස්ටාබර්ඩ් හෙවත් දකුණු පැත්තේ කෙලවරක විය. එහි අනෙක් පැත්තවු වම් කෙලවරේ අපට ලැබුනු අලුත් කැබින් කාමරය වුනි. මෙම කැබිනයේ ඇන මුරිච්චි සේම කොසු පාපිසි තෙල් පිසදැමිමට අවශ්‍ය රෙදි කැබිලි පිිරවු ගෝනිද තිනර් හා යන්ත‍්‍රසූත‍්‍ර පිරිසිදු කරන්නට ගන්නා විවිධ වර්ගයේ කෙමිකල් බැරල්ද ගබඩාකර තිබුනි. පෑස්සුම්කරුවන් දෙදෙනා පාවිච්චි කල කැබිනය තිබුනේ මෙම ගබඩාවට යාබදවය. අගුලුලා තිබු මෙම ගබඩාවෙන් බොහෝ අවස්ථාවලදි බඩුභාණ්ඩ රැගෙන එම සිදුකලේ මා විසිනි. ටික දිනක පටන් එම ගබඩාවේ තිනර් සුවදක් වහනය වන්නට විය. එහි තිබු අධික තිනර් සුවදට හේතුව හොයා බලද්දි ලිටර් 20 තිනර් බැරලයක කුඩා සිදුරක් ඇතිවි ඉන් තිනර් වෑස්සෙන්ට පටන් අරන් තිබු බව පෙනුනි. බිමට රෙදිකඩක් දමා වෑස්සුනු තිනර් පිසදමා තිනර් වෑස්සිම නවතාලන්නට එහි පැත්ත වෙනස් කලෙමි. එහෙත් වාෂ්පශිලි ද්‍යවයක් වන තිනර් සුවදින් මුලු කාමරයම වැසී ගොසිනිි. දිගින් දිගටම කෙනෙහිලිකම් සිදුවන මේ නෞකාවේ සේවය කරන්නට තව දුරටත් මාගේ සිත ඉඩදෙන්නේ නැත. නියමිත කාලයට ප‍්‍රථම එහෙත් පළමු නැවෙන්ම තම කැමැත්තන් ඉල්ලාගෙන ගෙදර යාම හා සමාගමෙන් යළි නැවක් ඉල්ලීම ප‍්‍රශ්ණ ගොඩකට අතවැනිමකි. බොහෝ දිනක්ම මොලය වෙහෙසන්නටවුයේ ප‍්‍රශ්නයක් ඇති නොකරගෙන මේ ජරා කබල් නෞකාවෙන් ගෙදර යන විදිහක් ගැනය. එදින සේවාමුරයෙන් පසුව නිදා ගන්නට ගිය පසුව මාගේ සිතයට සිටි යක්ෂයා අවදිවුයේය.

       කලකට ඉහත මා පියානන් සේවය කල නෞකාවක් ගිනි ගැනිමකට ලක්වුන බව මතකයට නැගින. ඔහු ඒ නෞකාවේ සේවයට එක්වි සවුදි ආරබියාවෙන් එක්වි නැව දියඹට පිටත්වු දිනයේදිමය. නැවේ ඇතිවු ගින්න නිවා දමන්නට කිසිවෙකුත් උත්සාහ නොකල අතර සියල්ලන්ම තැත් කර ඇත්තේ ඉක්මනින් නැවෙන් පිටමං වන්නටය. ගිනි නිවාරනය හා ජිවිතාරක්ෂාව ගැන පාඨමාලාවන් එකල නැවියන්ට නොතිබු අතරම හදිසි අවස්ථාවලදි කිසිවෙකුත් ඒ අවස්ථාවන්ට අනුකුලව කටයුතු කරන්නේද නැත. හදිසි තත්වයන් වලදි කලයුතු දෑ ගැන වැඩ පිලිවෙලක් තිබුනත් බොහෝමයක් ඉන් තැති ගැන්වි කරන්නේ තමන්ගේ ජිවිතය ආරක්ෂාකරගන්නට උත්සාහකිරිමක් පමණි. නාවික යුධ නෞකාවකින් පැමිනි ජිවිතාරක්ෂක බොට්ටුවකට නංවාගත් නිසා එකෙකු හැර ඒ නැවේ නැවියන් සියල්ලම බේරාගනු ලැබින. එන්ජින් කාමරයේ සිටි ලාංකික දෙමළ ජාතිකයෙකු ගින්නෙන් දැවිගියේය. නැව සම්පුර්ණයෙන්ම පාහේ විනාශවි ගියේය.
    

 
ගින්න ඉක්මනින් පැතුරුනු විටකදි


            ඉක්මනින් ගිනිගන්නා සුලු වාෂ්පශීලි තිනර් වෑස්සුනුු කැබින් කාමරයට ගිනි ගතහොත් ජිවිත හානි නොවි නැවටත් ලොකු හානියක් වන්නේ නැතැයි මා කල්පනා කරන්නට විමි. අල්ලපු කාමරයේ පෑස්සුම්කරුවන් දෙදෙනාගේ අධික දුම්පානය කැබින් කාමරය ගිනි ගැනිමට හේතුව ලෙසින් සකසා ඔවුන්ගෙන් පලිගැනිමද පුලුවන. දින කිහිපයකම සිට නැවට ගිනි තැබිමේ ක‍්‍රියාන්විතය සිතින් සැලැසුම් අදින්නට පටන්ගතිමි. කිහිප විටක්ම අදාල ගබඩාවට ගොස් සැලසුම කි‍්‍රයාවට නංවන්නේ කෙසේදැයි බලන්නට සිදුවිය. 
ඇලිවේ (Alleyway) හා කැබින් කාමර


          කැබින් කාමර දොරවල්වල වාතය එහා මෙහා ගමන් කලහැකිවන පරිදි යටින් ලුවරයන් සකසා ඇත්තේය. එහි සිදුරක් හරහා දැල්වු සිගරට් කොටයක් ඇතුලට විසිකර තිනර්වලට ගිනි අවුලවාලීම සැලසුමේ ප‍්‍රධාන කාර්්‍යයයි. එහෙත් දුම්පානය කරන්නෙකු බී විසිකරනා සිගරට් කොටය මේ කුඩා සිදුර තුලින් ඇතුලට වැටිමේ සියයට දශම ගනක සම්භාවිතාවක් වේ. තවදුරටත් මේ කි‍්‍රයාව කි‍්‍රයාත්මක කරනවාදැයි සිතෙන් තර්ක කරන්නට විමි. පියානන් සිටි නැව ගිනිගැනිම නිසා ලාංකික දෙමල නැවියෙක්ට ජීවිතය අහිමිවිය. ති‍්‍රකුණාමලයේ වරායෙන් පිටත්වු පසුව උතුරුකොනේ කන්කසන්තුරයට ලගාවනතෙක් අපව ආරක්ෂාකරන්ට අහසේ වැඩ වසනා තිස්තුන්කෝටියකින් එක දෙවියෙක්වත් නොවන කල්හි ත‍්‍රස්තවාදි යුද්ධයක් මැද උතුරේ මහ සයුරේ තියෙන ගිනි ගන්නා නැවක් හා එහි සිටිනා කාර්ය මන්ඩලය බේරා ගන්නට එන්නට කෙනෙකු නැත. කෙනෙකුගෙන් පලිගන්නටත් ගෙදර යන්නටත් කරන්න හදනා වැඩේන් මාද අමාරුවේ වැටෙන වැඩක් බව දින කිහිපයක් කල්පනාකල පසුව වැටහුනි. නැවට ගිනි තියනා අදහස හා සැලසුම අතහැර දැමුයේ මා වෙනුවෙන් අනුයුක්ත කරනා වෙනත් ආධුනිකයෙක් එනතුරා ඔනෑම දුකක් විදින්නෙමි සිතමින්ය.  


සයුරේ ආ මඟ 

ජනේලයෙන් බලන්නට සිදුවු වල්ඩ් කප් එක හා එන්ජින් කාමරයෙන් ආ හොල්මන .-  සයුරේ දසවසක් - 13

17 comments:

  1. අසංග, එච්චර ලේසියෙන් එහෙම දෙයක් අත හැර දානවද.... මම නං....

    ReplyDelete
    Replies
    1. වැඩේ කරන්න තිබුනා වාරයක් ලගපාතක වත් තිබුනොත්. කොටින්ට බයේ නැව යාත‍්‍රා කරන්නේ අන්තර්ජාතික මුහුදු සිමාවේ. ති‍්‍රකුණාමලේ ඉදලා කන්කසන්තුරයට යන්න දවස් හතරක්වත් යනවා. ඉදිරියට යනවාට වඩා එකතැන කොටනවා. බොහෝම පරන නැවක්. ඉතිං කොහොමැයි ඒවාගේ ගේමක් දෙන්නේ? එහෙම කලානම් සාදාකාලිකව ටයිටැනික්වාගේ මුහුදු පතුලේ තමයි.

      Delete
  2. නාවිකයා හැමදාම තරුණයි, නාවිකයා හැමදාම මුහුදේ. නාවිකයා කවදාවත් වයසට යන්නේ නැහැ. ඔහු කාලය සමග වියැකි යනවා පමණයි.

    නාවිකයා වඩේ එකක් කා තේ එකක් බොන්නට හෝටලයට ගියත්, ඔහුගේ බෑග් එක ඒ හෝටලයේ අපිරිසිදු බිම නොතබයි. ඔහු වාඩිවූ මේසය අපිරිසිදුනම්, වේටරයකු අමතා, එය පිරිසිදු කරන ලෙස දන්වයි. ඔහු වාඩිවෙන්නේ හෝටලයේ පුළුල් පරාසයක් නිරීක්ෂණය කළහැකි ආකාරයටය. ඔහු කතාකරන්නේ අවශ්‍යනම් පමණි. ඔහු වාඩිවෙන ඉරියව්වද සංවර සහ ස්ථාවරය. ඔහුගේ ගමන බිමන, ඇඳුම පැළඳුම ආදියෙන්ද, ඔහු ලබා ඇති ශික්ෂණය පිළිබිඹු වේ.

    සාමයෙන් යුතුව මහා සාගරයේ යාත්‍රා කරනා නිර්භය මිනිසුන් සිය කැපවීම තුළ මනුෂ්‍ය වර්ගයාට බලාපොරොත්තුවක් තිබෙන බව ඔවුහු දැන සිටිති.

    මේ මිනිසුන් මනුෂ්‍ය වර්ගයාගේ උතුම්ම අරමුණ වන සත්‍යය සහ අවබෝධය සොයාගැනීම සඳහා සිය ජීවිත කැප කර තිබේ…..

    ඒ උත්තම නාවිකයන්ට සාන්ත අන්තෝනි මුණිතුමාගේ පිහිට ආරක්ෂාව පාර්ථනා කරමු......

    ReplyDelete
    Replies
    1. ස්තූතියි. ඔබතුමාටත් එතුමාගේ පිහිටාරක්ෂාව ලැබේවා.

      Delete
  3. ඔය වගේ වැඩ නම් නොකළ එකම හොඳයි . මිනිස්සු එක පැත්තක් ගන්නවා නම් ඔතන ඉන්න එක භයානක නිසා යන්න තිබ්බේ . හෙල්ත් ඇන්ඩ් සේෆ්ටි කියන ඒවා සලකලම නැති නැවක්

    ReplyDelete
    Replies
    1. පලමු නැව හින්දා ඉල්ලලා අයින්වෙන්න බෑ. අනික ටෙ‍්‍රනින් කාලේ ලැබෙන පලවෙනි එක. මේ කොම්පැනියේ තිබුනේ පිටරටවලින් යකඩ වලට (Scrap) විකුණන කසිකබල් පරණ නැව් (Rust Buckets) අඩුවට අරන් මෙහේ දුවපු එක. එවායේ කිසිම දෙයක් නෑ.

      Delete
  4. https://nltimes.nl/2018/10/25/arson-suspected-cruise-ship-fire

    ReplyDelete
  5. නැව් වල තියෙන කාමරවල අඩියට සිමෙන්ති දානවක කියල අදමයි ඇහුවෙ.

    මොනව උනත් හත් අට දෙනෙකුට බාබකිව් වෙන්න තිබ්බ අවස්ථාව නූලෙන් මිස් වෙලා වගෙයි.

    ReplyDelete
    Replies
    1. කාමර වල තියෙන්නේ පොලවට සිමෙන්ති වර්ගයක් දමනවා. එක උඩින් නොලිස්සන සුලු විශේෂ ඝනකම් ප්ලාස්ටික් කාපට් එකක් අලවනවා. නිලධාරින්ගේ කැබින් වලට බූල් කාපට් අතුරලා තියෙන්නේ. බාත්රුම් හා මුලුතැන්ගේ නොලිස්සන ටයිල් අල්ලලා තියෙනවා. මගී නැව් වල ඔයිටත් වඩා අලංකාරය දේවල් තමයි තියෙන්නේ.

      රොස්ට් කරන්න දෙයක් නෑ. ටික කාලෙකට පස්සේ මුහුදු කොටි එක ගිල්ලුවා.

      Delete
  6. MERCURY LEADER කියන ජපන් නැවේ ඩේක් ඔෆිසර් කෙනෙක් තමයි අපේ තාත්තා. ඔයා ඒ නැව දන්නවද අංකල්?
    -පබසරා

    ReplyDelete
  7. ඔය වගේ පිරිසක් එක ඔය වගේ අසාධාරණකම් වලට මුහුන දෙන එක් මේක කියවන තරම් ලේසි නෑ කියලා මම අත්දැකීමෙන් දන්නවා අසන්ග. නැවක නොවුනත් මමත් ඔය වගේ තැනක අවුරුදු පහක් දුක් වින්දා. කැකිල්ලේ තීන්දු ගන්න ලොක්කෙකුයි ඊටම හපන් ඌට ගොට්ට අල්ලන සේවකයෝ ටිකකුයි එක්ක ජොබ් එක බේරගෙන ඉන්න මමත් සෑහෙන කට්ටක් කෑවා. මට තිබ්බ අනික් ප්‍රශ්නේ තමා ගෙදරින් දීපු ප්‍රෙශර් එක. කොයිතරම් අසාධාරණයට ලක් උනත් ගෙදරින් තල්ලු කරේම ජොබ් එකේ එල්ලිල ඉන්න තැනට. සමහර වෙලාවල් තිබ්බා එකෙක් දෙන්නෙක් මරන තැනට කේන්ති ගියපු. ඒත් ඉවසීමෙන් අමාරුවෙන් දත කාගෙන කොහොම හරි එල්ලිලා හිටියා. ලොක්කා කොයිතරම් ජරා සතෙක්ද කියනවනම් අවුරුදු තුනක් හෝ හතරක් ප්‍රමොශන් එකයි වැටුප් වර්ධකයයි දෙකම මේසෙ උඩ තියාගෙන් හිටියා අනුමත නොකර. ඒ විතරක්නම් මදැයි.. මම ඉල්ලපු ට්‍රාන්සර් එකත් අනුප්‍රාප්තිකයකු නොමැතිව නිදහස් කල නොහැක කියලා ලියලා අත්සන් කරලා හිර කරා. හැබැයි මමත් ඔලුව නැවුවෙම නෑ. අනික් උන් කොන්ද නවාගෙන වරප්‍රසාද ලබද්දි මං ගේමට ගේම් ඉල්ලුවා ප්‍රසිද්ධියේ. අවුරුදු පහක් අවසානයේ ට්‍රාන්සර් එක් ලැබුන නිසා තව අවුරුදු හයක් ජොබ් එක කරගන්න ලැබුනා. එහෙම නොවුනානම් මේ වෙද්දි ලොක්කා මගෙන් මැරුම් කාලා මං හිරේ ඉන්න බොහෝදුරට ඉඩ තිබ්බ. අසන්ග පත්වෙච්ච තැනට මං පත්වුනානම් අනිවාර්‍යෙන් ඔය කිව්ව උදවියගෙන් කිහිප පොලක් අනිවාර්‍යෙන්ම මගෙන් ඉගෙනගන්නවා අමතක නොවෙන පාඩමක්. තමුන් කරන දේවල්වල ප්‍රතිඵලය කවදා හෝ ඒ උදවිය නෙලාගන්නවා අනිවාර්යයෙන්ම.

    ReplyDelete
    Replies
    1. //තමුන් කරන දේවල්වල ප්‍රතිඵලය කවදා හෝ ඒ උදවිය නෙලාගන්නවා අනිවාර්යයෙන්ම.///

      ඇත්තෙන්ම නැව් වල සිටිය ජරාම ජරා අන්තිම කැතවැඩ කරන පොරවල් වලට ඉක්මනින්ම ඒ කරපු පව් පඩිසන් දුන්නා. සමහරුන් පිලිකාවෙන් සමහරු නොහිතුවිරු විදිහට හදිසි අනතුරුවලින් මිය ගියා. ඒවාට හේතු වෙන්නත් ඇත්තේ ඔය නැව් වලට ආපු ටෙ‍්‍රනින් කොල්ලන්ට දුන්නු දස වද වලට උන් කරපු සාපයන් වෙන්නැති. බක සිල්වලාට මෙනවාද උනේ කියලා දන්නේ නෑ. ඒ නැවෙන් පස්සේ උන්ව හමුවුනෙත් නෑ. හැබැයි ඒ නැව් වල කාපු කට්ට ජිවිතයට හොද රුකුලක් උනා ඔනෑම ස්ථානයක වැඩ කරන්න පුලුවන් වෙන්න.
      හැබැයි අම්බලන්ගොඩයෝ මට වඩා වෙනත් රටවල් රැුකියා කරපු ඔබ දන්නවා ඇති අපිට වල කපන්නේ අපේම ජාතියේ අපේම රටේ උන් මිස පිටරටවල් වල උන් නොවන බව.

      Delete
  8. අම්මෝ... මාර ස්ට්‍රෙස් එකක්නෙ ඒක… ඇති කාටවත් අනතුරක් නොවුනා...

    ReplyDelete
    Replies
    1. නාවික ජිවිතය කියන්නේ සුන්දර දෙයක් නොවේ. පසු කාලිනව එකට හිටිය කිහිප දෙනෙකු මුහුදේදි හදිසි අනතුරුවලින් මිය ගියා.

      Delete

අදහස් මෙතන නිදහස් කරන්න

බත්තල ඇදගෙන එම හා කරුවලේ විංචි පිසදැමිම - සයුරේ දසවසක් - 15

         අප සමාගමේ අනෙකුත් නෞකාවන් සේ පේදුරු තුඩුවෙන් බඩු බෑමක් මා සිටි නෞකාවේ සිදු නොවුයේ අපට රැගෙන ආවේ ති‍්‍රකුණාමලය වරායේ සිට පාන් පිට...