Posted: 03 Jun 2019 10:45 PM PDT
මේ නෞකාවට මා සේවය සදහා ගොඩවද්දි සිටි අය අතුරින් කිසිදා අමතක නොවනා චරිත කිහිපයක් සිටි අතර ඔවුන්ගෙන් එක් අයෙක් පසු කාලයකදී මේ නෞකාවට එල්ලවු ත‍්‍රස්තවාදි ප‍්‍රහාරයේදි අතුරුදහන් ලැයිස්තුවට එක්වුනි.
 මාගේ සේවය අයිති එන්ජින් අංශයේ ඔයිලර්ලා ලෙසින් සිටි ජයතිස්ස අයියා සිරුරෙන් තරමක් කොට ලෝක අන්ඩපාලයෙක් වු අතර ඇගපතින් වැඩුනු පබ්බතයාත් කපටිකයිරාටිකයෙක් වෙන්නට තැත් කර හත්පොලේ ගාගන්නා මෝඩයෙක් විය. ඩෙක් අංශයේ එබි කෙනෙකු ලෙසින් සිටි බොරු ඇසක් පැලදි එකැස් ....... පාල තමන් සියල්ල දන්නා බව පෙන්වන අති පන්ඩිතයෙක් වුනි. කාපෙන්ටරයාද තරමක පන්ඩිතයෙකුවු අතර නාවික ජිවිතයට ආධුනිකයින්වු අපව පසියෙකටවත් මායිම් නොකල එකෙකු වුණි. එකැස් ....... පාල ජයතිස්ස අයියාට ඇමතුවේ ඩැඩියා යන නමිනි. වැඩ නිමවු පසු කටේ තොලේ ගාගත් එකැස් ....... පාල ජයතිස්ස නොමැති තැන ඔහුට අපහාස උපහාස කරන්නට පටන්ගෙන තිබුනි. මෙය ජයතිස්සට එහෙන් මෙහෙන් ආරංචිවුවත් එකැස් පාලත් අතර නොහොද නොක්කඩුවක් එලිපිට පෙනෙන්නට නොතිබුනත් ටිකෙන් ටික අමනාපයක් ගොඩනැගිමින් තිබුනි. බොහෝ කැබින් කාමර ගලවා දමා තිබු අවදියේ කඩ්ඩාටත් මාහටත් නිදන්නට කැබින් කාමරයක් නොතිබුනු බැවින් ජයතිස්ස හා පබ්බතයා සිටි කැබිනයේ බංකුවේ මාරුවෙන් මාරුවට නිදාගන්නා අවදියේ දිනක සිදුවු සිදුවිමක් මාගේ මතකයට නැගෙයි. දිනක් ජයතිස්ස අයියා නිදා ගන්නට ඇලවුන සැනින් ” එයි මල්ලි ඉක්මනට ලයිට් එක දාපං.” ”ඇයි මොකද?” ”මොකක්ද ඇනුනා බං.” මා ඉක්මනින් කැබිනයේ විදුලි පහන දැල්වුයෙමි. ඇදේ වැතිරගෙනම කොට්ටය අස්සට අත දැමු ජයතිස්ස අයියා කොට්ට උරය තුල තිබු බිත්තරයක් ඉන් ඉවතට ගත්තේය. ”මේ බලපං මේන් බිත්තරයක්.” කොට්ටය තුල සගවා තිබු බිත්තරය දැක විශ්මයට පත් ඔහු ඇගිලි තුඩුවලින් අල්ලා ගත් බිත්තරය මාහට පෙන්විය. මැජික් කරුවෙකු තොප්පියක් තුලින් හාවෙකු රැගෙන පෙන්වන්නාක් සේ ඔහු කොට්ටය තුලින් බිත්තරය අරන් පෙන්නු සැනින් මාගේ සමච්චල් සහගත සිනහාව පුපුරා ගියේය. ඉන් නොරොක්වු ජයතිස්ස අයියා ”නවත්තගනිං උඹේ හිනාව.”
”මේක ෂුවර් එකටම පබ්බතයා ගෙනවිල්ලා හංගපු එකක්. ඔය මිනිහා Dry provision එකෙන් හොරකම් කරන එවා මෙතන ගෙනල්ලා හංගනවා.” ජයතිස්ස අයියා කෝපයෙන් කීවේය. නැව තවමත් ඇත්තේ අලුත්වැඩියාවන් කරනා අතරතුරේය. අපගේ කැබින් කාමර සේම වියලි ආහාර ගබඩාවද කඩා තිබු නිසා බිත්තර මැගි නුඩ්ලස් වැනි දෑ කැබින් කාමරවලට ගෙනගොස් සගවා තබා රාත‍්‍රි සේවා මුරයේදි ඇතිවන පොඩි බඩගිනි නිවාගන්නට බොහෝ අය පෙලබි තිබුනි. බිත්තරයේ උල්පැත්තක් හිසට තදවුනු බැවින් එය නොබිදි ගියේ ජයතිස්ස අයියාගේ වාසනාවට වෙන්නට පුලුවන. බිත්තරය සගවන්නට ඇත්තේ පබ්බතයා යැයි ජයතිස්ස අයියා සිතුවත් ඇත්තෙන්ම එසේ කලේ වෙනකෙකුය. ”ඔන්න බලපං ලගදීම ඩැඩියාට වෙනදේ.” කියමින් දින කිහිපයක්ම ඩැඩියාට පාඩමක් උගන්වනවා කියා මා සමගින් පාරම්බෑ එකැස් ......පාලගේ වැඩක් වෙන්නට ඇත. මෙය සගවාලන්නට ඇත්තේ එකැස් පාලයි කියා තවත් ගින්නක් එකැස් ......පාල හා ජයතිස්ස අතර ඇරඹිමක් නොකලයුතු බැවින් කිසිවක් නොදන්නා ලෙසින් සිටින්නටවිමි. බිත්තරය මේස ලාච්චුවට දැමු ජයතිස්ස අයියා පබ්බතයාට දෙස් තබමින් යලි නිදන්නට විය. මේ බිත්තර සිදුවිම නිසා පබ්බතයා හා ජයතිස්ස අයියා අතර තරමක හිත් නොහොදක් ඇතිවුනත් එය දිගටම ගෙනයන්නට සිදුනොවුනේ ජයතිස්ස අයියාද ටික දිනකින් මේ නෞකාවේ තම සේවය නිමකර නිවස බලා පිටත්වු බැවිනි. කෙසේ හෝ මෙම බිත්තර සැගවිම .... පාලගේ වැඩක් බව ජයතිස්ස අයියා දැනගත් අතර ඉන් අනතුරුව අපටත් කැබින් කාමරයට යන්නට නොහැකිවන සේ අගුලා තබන්නට ඔහු වගබලාගත්තතේය. නාවිකයන්ගේ ඇඳ ඇතිරිලි කොට්ට උර සෝදා වියලා ගන්නට බොහෝ විශාල නෞකාවල ලොන්ඩරි කාමරයක් හා එහි රෙදි සෝදන යන්ත‍්‍රයන්ට අමතරව වියලීමේ යන්ත‍්‍රද සවිකර තිබුනත් මේ නෞකාවේ අපගේ රෙදි සේදිමට අවශ්‍ය යන්ත‍්‍රයන් තිබුනේ නැත. එහෙයින් ති‍්‍රකුණාමලයෙන් හෝ ගාල්ලෙන් ලොන්ඩරිකාරයා එන තෙක් බලා සිටින්නට සිදුවිය. බොහෝමයක් අය තම තමන්ගේ ඇදුම් හා ඔවරෝලයන් සෝදා එන්ජින් කාමරයේ අත්වැට හි එල්ලා තබන්නට පුරුදුව තිබුනි. එහි ඇති අධික රස්නය නිසා ඉක්මනින් වියලුනත් ඇතැම් අවස්ථාවලදි නැවේ පැද්දිල්ලට අත්වැටෙන් මිදි පහල තට්ටුවක තිබෙන තෙල් ගොඩක් උඩ පතිතවන අවස්ථාවල්ද තිබුනි. එන්ජින් කාමරයේ ඇදුම් වේලිමට බොහෝ චිෆ් ඉන්ජිනේරුවරුන් ඉඩ දුන්නේ නැත. ඒවා අධික රස්නයක් ඇති එන්ජිමක් මත පතිත විමෙන් ගිනි ගැනිමකට ලක්වෙන්නටත් ඉඩහැකිවු බැවින්ය. බොහෝ දෙනෙක් රෙදි සෝදා රාත‍්‍රියට එන්ජින් කාමරයේ අත්වැටහි එල්ලුවේ ප‍්‍රධාන ඉංජිනේරුවරයා නොඑන වේලාවන් බලාය. නෞකාව වරායට පැමිනෙන අවස්ථාවලදි වලදි ලොන්ඩරිකාරයා පැමිනෙන්නේ නැත. එවිට තවත් වාරයක් කන්කසන්තුරයට ගොස් එනතෙක් කුණු වැකී දුඹුරු පාටවුනු ඇඳ ඇතිරිලි කොට්ට උර හා මලකඩ හෝ තෙල් වලින් කලු ගැහුනු ඔවරෝල් පාවිච්චි කලයුතු විය. ඇතැම් විට ඔහු රැගෙන ගිය අපගේ ඇඳ රෙදි කලිසම් කමිස නැව පිටත්වන තෙක්ම යළි රැුගෙන එන්නේ නැත. නැවේ වතුර තිබ්බත් තමන්ගේ රෙදි සෝදාගන්නට කම්මැලි පබ්බතයා සතුව තිබු ඇදුම් සෙට් එක මාරුවෙන් මාරුවට අදින්නට වුනි. ජයතිස්ස අයියා මේ අරුම පුදුම ක‍්‍රමය හැදින්වුයේ පබ්බතයාගේ ඔටෝ ලොන්ඩරි දැමිල්ලක් ලෙසිනි. මේ ඔටෝ ලොන්ඩරි දැමිල්ල පබ්බතයා සිදුකලේ ඔහු හා ජයතිස්ස අයියා සිටි කැබින් කාමරයේ කමිස හා කලිසම් ඇනයක එල්ලාගෙනය. ලොන්ඩරි කාරයා සෝදා පිරිසිදු කර ගෙනන ඇදුම් සෙට් එකෙන් කලිසමක් හා කමිසයක් ගෙන ඇගලාගන්නේ දින කිහිපයක් එක දිගට අදින කලිසම් හා කමිසය ගලවා ඇනයේ එල්ලු පසුවය. ඉන්පසුව දින කිහිපයක් අදිනා එම ඇදුම් ගලවා ඇනයේ එල්ලා යළිත් අලුත් ඇදුමක් ඇදගනියි. මෙය මාසයක් හමාරක් යනවිට ලොන්ඩරිකාරයා ගෙනා සේදු ඇදුම් අහවරවේ. ඇනයේ මුල එල්ලි ගෙන ඇති ප‍්‍රථමයෙන් ඇදි ඇදුම යලිත් අදින්නට පබ්බතයා පෙලබෙයි. යලි යලිත් එකම ඇදුම් සෙට් එක ඇනයේ චක‍්‍රානුකුලව කෙලවරට එයි. නෞකාව ත‍්‍රිකුණාමලයට පැමින ලොන්ඩරිකාරයා ගෙනගොස් සෝදා මැද ගෙනවිත් දෙන තෙක් ඌරන්ට මොන සෞඛ්‍යද කියන්නාක් මෙන් කිහිප වාරයක් වක‍්‍රානුකූලව උඩ යට මාරුකරමින් පබ්බතයා සියළු ඇදුම් නොසෝදා අදිමින් සිටින්නට පුරුදුව සිටියේය. නැව් සමාගමේ පැරණි නාවිකයෙකුවු එකැස් .......පාලට බොරු ඇසක් පලදින්නට සිදුව තිබුනේ නැවකදි සිදුවු අනතුරක් නිසා බව කිහිප දෙනෙකු මාහට පවසා තිබුනි. මේ නැව් සමාගමේ සුප‍්‍රසිද්ද චරිතයක්වු මොහු බොකටු කොන්ඩයක් තිබු කෙසග පුද්ගලයෙකුවුනි. ...... පාල මත්පැනටත් දුම්පානය සේම ත‍්‍රිලෝකවිජය පත‍්‍ර පානයටත් ගිජුවුවෙකු විය. කියන ඔ්නෑම වචනයකට හරස් වචනයක් කියන්නටද දෙපිටකැපෙන වචනද ඔහු ලග විය. ”හු...... තියෙන්නේ ඉත්තෑවෙක් ” එකැස් පාලගේ ජනප‍්‍රිය වචනයක් වුනි. ඔහු තිරිකුණාමලයේ නිවස තිබුනේ කියා සිටියත් පිටකොටුවේ රෝහිණි පටුමගේ කාපිරි මුඩුක්කුවේද නවාතැන්ගෙන සිටියේය. නැවට ආධුනික වුවත් තමන්ගේ අංශයේ කෙනෙකු නොවු නිසා මාහට වැඩිය ගෙරවිලි දමන්නට නොආවත් ඉඩ ලැබු සෑම අවස්ථාවලදි කෙනහිලිකම් කරන්නද ආ පිරිසට ඔහුත් අයිතිවුනි. .... පාල අයියාට වැඩිදිනක් ඒ නෞකාවේ සේවය කරන්නට ඉඩ නොලැබුනේ ති‍්‍රකුණාමලයෙන් නිවස බලාගොස් යලි නැවට පැමිණිමේදි කල සෝදිසියකදී පොලිස් අත්ඩංගුවට පත්විමෙනි. ඒ ඔහුගේ ගමන් මල්ලේ තිබු ත‍්‍රිලෝකවිජය පත‍්‍ර පොලිස් ඇසට හසුවිමෙන්ය. මා නාවික දිවියෙන් සමුගත් පසුව මාහට ඔහුව යලිත් හමුවුයේ බොහෝකලකට පසුවය. එම සමාගමට අයිති නෞකාවක තින්ත ආලේප කරමින් සිටි ඔහුව දුටු මා ලගට ගොස් ඇමතුවෙමි. ”ආ .....පාල අයියා තාමත් ඉන්නවා නේද?” ”ඇයි හිතුවේ මං මැරිලා කියලාද?” කී ඔහු ඉක්මනින් මා මගහැර ගියේය. මසකට වරක් නැවේ බොන්ඩඩ් ස්ටොරුවේන් (Bonded Store) වැටුපෙන් අඩුකරගැනිමට විස්කි හෝ බ‍්‍රැන්ඩි බෝතලයක් සහ අවශ්‍ය නම් බෙන්සන් සිගරට් කාටුනයක් ලබාගත හැකිවුනි. සමහර කපිතාන්වරු ආධුනිකයින්ට මේ වරප‍්‍රසාදය ලබාදුන්නේ නැත. ලිස්සා වැටි අත කඩාගත් කපිතාන්වරයා ආධුනකයින්ට විස්කි බෝතලයක් ලබාදුන්නත් ඉන් අනතුරුව ආ කපිතාන්ට කොතරම් කන්කෙදිරිගෑවත් ඔහුගේ හිත නැමුනේ නැත. බොහෝ අවස්ථාවල් වලදි අප ලබාගන්නා විස්කි බෝතලය නැවේ නොබි සුරැකිව තබා ගන්නේ ගෙදර ගෙනගොස් යහලුවන් සමගින් බොන්නටය. කඩ්ඩා කපිතාන්ට පින්සෙන්ඩුවි ගත් විස්කි බෝතලයක් ගෙදර ගෙනයෑමට සුරකිව තබාගෙන සිටියේය. එහෙත් විස්කි බෝතලය කාගෙන් වසං කලත් පබ්බතයාගේ සුක්ෂම දෑසට වසං කලහැකි නොවිය. නැවේ බොන්ඩඩ් ස්ටොරුවේ බොතල් අවසන් විය. යලි ති‍්‍රකුණාමලයෙන් හෝ කොළඹින් නැවට බඩු එනතෙක් කිසිවෙකුටත් බොන්නට විස්කි හෝ බ‍්‍රැන්ඩි බෝතල් නිකුත් කලේ නැත. ඊලග වාරයේදි නැවට විස්කි ආ පසුව දෙන පොරොන්දුව මත කඩ්ඩාගේ බෝතලය ගන්නට උත්සාහ කලත් කඩ්ඩා එය දෙන්නට කැමති නොවිය. බිමට කෑදරයෙක් වු පබ්බතයා වරෙක මා රවටා කඩ්ඩාගේ බෑගයේ තිබු විස්කි බෝතලය ගන්නට උත්සාහ කලේය. මා ඔහුට උදව් නොකලත් පබ්බතයා කෙසේ හෝ එම බෝතලය උස්සා බිවේය. පබ්බතයා තමන්ගේ හොරකමට හවුල්කරගැනිමට මාහටත් පොඩි ෂොට් එකක් දෙන්නට අමතක නොකලේය. බොන්නට ඇතිවු කෑදරකමටද දෝ පබ්බතයාගේ ගැටයට මා අසුවුනි. තමන්ගේ බෑගයේ විස්කි බෝතලය උස්සා ඇතිබව දැනගත් අසීමිත ලෙසින් කෝපවු කඩ්ඩා කපිතාන්ට පැමිණිලි කලේය. ඔහු හිතුවේ මා පබ්බතයා සමගින් විස්කි බෝතලය උස්සා බී ඇති බවය. කපිතාන්වරයා පැමිණිල්ල විභාගයට මා කැදවිය. පබ්බතයා පානය කලේ කාගේ බෝතලයද නොදන්නා බවත් ඔහු දුන් පොඩි ෂොට් එක පිලිගත් බවත් මා කපිතාන්ට පැවසුවෙමි. පබ්බතයාගේ හොර වැඩය ගැන හොද හැටි දැනගත් කපිතාන් ඔහුට අවවාදකර මාසික වැටුපෙන් අයකර විස්කි බෝතලයක් කඩ්ඩා නැවෙ සේවයෙන් මිදියනදා ලබාදුනි. මේ සිදුවිමෙන් අනතුරුව පසුව අප දෙදෙනා සමගින් විශේෂයෙන් කඩ්ඩා සමගින් පබ්බතයා සිටියේ හිත නොහොදින්ය. දිනක් සැන්දෑ යාමයක කඩ්ඩාත් මමත් මෙස් කාමරයේ රාති‍්‍ර ආහාර ගෙන අවසන්ව සිටි වේලාවක තරමක් බී ගත් පබ්බතයා මෙස් කාමරයට කඩා වැදුනි. එහි සිටි අප හට පෙනෙන්නට කටමැත දෙඩවු ඔහු තමා හොද කරාටේ කරුවෙකුබව කීවේය. එහෙට මෙහෙට දෑත්වනා පෙන්වා අවසානයේ කකුලක් ඔසවා කික් පහරක් පෙන්නවන්ට මෙන් උඩපැන පහරක් එල්ල කලේය. අවාසනාවකට ඔහුගේ පහර පෙන්වන්නට එල්ලකල උත්සාහයේදි දණහිසට පහල තදබල ලෙසින් මේසයක වැදුනි. කකුල අල්ලාගෙන දෙකට නැවුන ඔහු බොහෝ අමාරුවුවත් අප දෙදෙනාට නොපෙන්වා අසීරුවෙන් මෙස් කාමරයෙන් පිටත්විය. අනතුර නිසා දින කිහිපයක් සේවයට යාගන්නට නොහැකිව පබ්බතයා කැබින් කාමරයට වි විවේක ගත්තේය.  විස්කි බෝතලයේ සිද්දියෙන් ප‍්‍රධාන ඉන්ජිනේරුවරයාගේ අප‍්‍රසාදයට පබ්බතයා පත්ව සිටියේය. කරාටේ සංදර්ශණ පෙන්වන්නට ගොස් කකුල කඩාගත් බව දැනගත් ප‍්‍රධාන ඉන්ජිනේරුවරයාද පසුවුයේ කෝපයෙනි. දින කිහිපයක් විවේක ගෙන යළි වැඩට ආවත් සරිර හොරෙක්වු පබ්බතයා කකුල අද්දමින් කිසි වැඩක් පලක් නොකර ඉන්නට උත්සාහ කලේය. එය ප‍්‍රධාන එන්ජිනේරුවරයාගේ කෝපය වැඩි කරවන්නක් විය. පබ්බතයාගේ මේ මගෝඩිවැඩ හින්දාම වැඩි කල් නොගිහින්ම ගෙදර යන්නට ටිකට් එක ඇදුනි. ඒ ඔහු වෙනුවෙන් කිසිවෙකුත් නැවට අනුයුක්ත නොකරමය. නැවේ අලුත්වැඩියාවන් සිදුකරන්නට අපගේ කැබින් කාමර සියල්ල ගලවා දමා තිබු බැවින් නිදාගන්නටවත් හරිහමන් තැනක් නොතිබුනු බව මෙයට පෙරදි සදහන් කර තිබුනි. දිරාපත්වු නැව් බදහි යකඩ තහඩු අලුතින් පාස්සා අලුත්වැඩියා නිම කලත් ගලවා දමා තිබු කැබින් කාමර සියල්ල යලි සකසන්නට වඩුවැඩ කරන්නට සිටියේ එක් පුද්ගලයෙක් පමණි. අප ඔහුව ඇමතුවේ කාපෙන්ටරයා යන නමිනි. එක ප්ලයිවුඩ් ලැලී කෑල්ලක් කියතින් ඉරන්නට පැය දෙකකටත් වඩා වැඩි කාලයක් ගන්නා ඔහු වැඩි හරියක් කලේ කඩා දැමු කැබින් කාමරයකට වි සිගරට්ටුවක් ඉරිමයි. එකැස් පාල ගේ ති‍්‍රලෝකවිජයපත‍්‍ර පානයේ සගයෙක්වු ඔහු අපහට කැබින් කාමරයක් නියමිත පරිදි සකසා දෙන තෙක් බොහෝ කාලයක් බලා සිටින්නට සිදුවුනි. නැව පිටුපස පුප් ඩෙක් හි අතින් කරකැවිය හැකි රීලයක සවිකර තිබු කොහුලණු පොටක් තරමේ ඝණකමැති තංගුස් ලනුවක් විය. නැව දියඹට ආ පසු කාපෙන්ටරයා තංගුසයේ අනෙක් අගහි කෙලවරකට කිරිපිටි පැකට්ටුවක ඊයම් කවරයක් තිරුවලට ඉරා සවිකර තිබු ඇමට අමුනා මුහුදට දැමිමයි. දිනපතා තංගුසය ඇදමින් මාලුවෙකු ඇම කා ඇතිදැයි බැලිම ඔහුගේ දිනචරියාව වුනි. මා මේ නෞකාවේ සිටි කාලය අතරතුරේදි අඩි තුනකට වඩා දිගින් යුතු විශාල කෙලවල්ලෙකුද ඒහා සමාන මන්නා පරවෙකුද බිලිබා ගන්නට මේ කාපෙන්ටරයා සමත්වුනි. ති‍්‍රකුණාමලයට ආපසුව පරවා කපා කරවල කර වියලන්නට සකස්කලේ වරාය අධිකාරියේ සේවය කල සිල්වායි. පසුකලකදි මේ නෞකාව කොටි ත‍්‍රස්තයින්ගේ ප‍්‍රහාරයකට ලක්වු අතර එහිදි අතුරුදහන්වු වු කිහිපදෙනා අය අතරේ කාපෙන්ටරයාද විය. තවත් දිනෙක චිෆ් ඉන්ජිනියර්ගේ කැබිනයේවූ නානකාමරයේ අපජලය බැසයෑම නතරවි තිබිනි. බාත්රූම් එකෙන් ස්කපරයට කම්බිකූරු යවමින් නලයේ සිරවිම සකසාලන්නට කරන්නට කඞ්ඩාත් ජයතිස්ස අයියාත් උත්සාහ කලමුත් ජලය බැසයෑම නිසි ආකාරයෙන් සිදු නොවිය. නාන කාමරය තුලින් වානේ කම්බි වයරයක් යවන්නට උදව්වට මාහටද ඔවුන් කතා කලෝය. එන්ජින් කාමයේ සිට ආ මා ආරක්ෂක සපත්තු දෙක පැලදගෙනම චිෆ් එන්ජිනියර් ගේ කැබිනයට ඇතුල්වූයෙමි. ”එයි කොහේද යන්නේ?” කැබිනයේ ඬේ බන්ක් එකට වි හාන්සිවි සිටි චිෆ් ඉන්ජිනියර් ඇසීය. ”බාත්රූම් එකට.” ”අයිසේ තමුසේ දන්නේ නැද්ද කැබින් එකට එනකොට ඔය සපත්තු දෙක ගලවලා එන්න? මෝඩයා වගේ ආවම මේ කැබින් එක ජරාවෙනවානේ.” ඔහු ගිගිරිය. ඔහුගේ නාන කාමරයේ රැුදුන ජරා අප ජලය පාගන්නට එපා කියනවා වෙනුවට පැලදගෙන සිටින සපත්තු දෙකද ගලවා එන්නයි ඔහු පවසන්නට විම මගේ සිත තුල ඇතිකලේ නොපහන් හැගුම් දහරාවකි. වයරය දමා එහි සිරවිම ඉවත් කරගන්නට හැකිවුයේ නැත. ස්කපර් එකට අධිපිඩන වායු බටයක් දමා අධිපිඩන වායුව එල්ල කලත් එහිවු සිරවිම ඉවත්කරගන්නට නොහැකිවුනි. පහල තට්ටුවේ ඇලිවේ හි සිවිලිම ගලවා අයින් කල ජයතිස්ස එය හරහා ගමන් කරන අපජල නලය සොයාගත්තේය. එක් තැනකින් නලය ගැලවු ඔහු එයට අධිපිඩන වායු නලය දමා රෙදි කැබලි කිහිපයක් ඇබයක්සේ ගසා බටය පසු පසට එ්ම වැලැක්විමට කඞ්ඩාට තදින් අල්ලාගෙන සිටින ලෙසින් කීවේය. හිස් තින්ත බාල්දියක් අනෙක් පස ට හරවා එය මත නැගුණු කඞ්ඩා බටය තදින් අල්ලාගෙන සිටින්නට විය. ජයතිස්ස අයියා කී ලෙසින් මා එන්ජින් කාමරයේ දොරටුවේ තබා ඔහු එන්ජින් කාමරයේ අධි පිඩන වායු වැල්වය අරින්නට ගියේය. කඞ්ඩා ලෑස්ති කී බැවින් මා එන්ජින් කාමයේ දොරකඩඉම සිට ජයතිස්සට වායුව අරින්නට සංඥකෙරුවෙමි. කඩ්ඩා මුලු ඇගේම වෙර යොදා බටය අල්ලාගෙන හිටියත් තප්පර කිහිපයක් ගත වෙන්නත් ප‍්‍රථම ඉහලින් පිටවන්නට නොහැකිවු අධි පිඩිත වායුව යලිත් ආපසු පසුපසට ආවේ වායු බටය එලියට ඇද දමමින්ය. බටය අල්ලාගෙන බාල්දිය උඩ සිටි කඞ්ඩා බිමට බැස්සේ ආලවක යක්ෂයා මෙන් වේෂ නිරුපනය කරගෙනය. කඩ්ඩාගේ මුලූ සිරුරම තද කලු පැහැයෙන් වසාගනිමින් එම බටයේ තැම්පත්වි තිබු අපද්‍යවය හාත්පස විසිරි ගොස් තිබුනි. සුදු පැහැයට තිබු ඉදිරි දත් පෙලද කලුව ගොසිනි.
ඔහු දුටුවනම මට හිනා පහලවුයේ නිතැනින්ය. ඉක්මනින් කඩ්ඩාව බාත්රූමයට එක්කන් ගියත් පිරිසිදු ජලය සිමාකර තිබු තත්වයක් උඩ අප තවත් අසරණ විය. ඔහුව නාවන්නට සිදුවුයේ වැසිකිලියට සපයා දී තිබු මුහුදු ජලයෙනි. සීතල කට්ටයෙක්වු ජයතිස්ස අයියා කඩ්ඩාට වැඩේ පවරා එන්ජින් කාමරයට පැනගත්තේ බටයේ සිරවිම විවෘතවුවහොත් සැමතැන විසිරෙන ජරා අපජලය ඇගේ තවරා නොගන්නටය. |
No comments:
Post a Comment
අදහස් මෙතන නිදහස් කරන්න