කොළොම්පුරේගේ දෙක ඉවරයි.

කොළොම්පුරේගේ දෙක ඉවරයි කිව්වාම හිතුවා නේද......... නෑ නෑ එක නොවෙයි. වරද්ද ගන්න එපා මේ බ්ලොග් එකේ දෙක. නෑ බොලව් බ්ලොග් එක පටන් අරන් අවුරුදු දෙකක් ගෙවිලා ඉවරයි. මිට අවුරුදු ගනනාවකට බොහෝ කලියෙන් විජය පරිගණක සගරාවේ තිබුන ලිපියක් දැකලා ඒකේ තිබුන ආකාරයට බ්ලොගක් හදන්නට උත්සාහයක් දැරුවා. වර්ඩ් ප්‍රෙස් වලින් විතරයි සිංහල බ්ලොග් ලියන්න පුළුවන් ප්ලැට්ෆොම් එකක් තියෙනවා කියලා කිව්වේ. එකේ තිබුන උපදෙස් වලට අනුව බ්ලොග් එකක් අටවාගත්තත් සිංහලෙන් කොටාගන්න බැරිවුන හින්දා අන්තිමේදි අතහැරලා දමන්ට සිද්දවුනා. උන් එකේ සිංහල අකුරු කොටන්නට යුනිකෝඩ් ගැන ලියලා තිබුනේ නෑ නොවැ .  

කොටලා සිංහල කොහොමද බ්ලොගක්   හදන්නේ
 නෑ   සහයට   කවුරුත්  ලග පාතකවත්     උන්නේ
කිසිදා නොදැකපු එකෙකුයි උපකාරෙට     එන්නේ
නදුන් රනවිරටයි කොළොම්පුරේ ස්තූතිය දෙන්නේ

ඔන්න ඔහෝමයි කොළොම්පුරේගේ බ්ලොග් ආගමනය මීට අවුරුදු දෙකකට කලියෙන් සිද්දවුනේ. ඒ අතරේ වර්ඩ් ප්‍රෙස් ඇලජික් උනු කාට කාටත් සප් එක දෙන බ්ලොගෙක් උපදෙස් මාලාවක් දුන්නා බොලේ.

අරහෙම මෙහෙම හදපන්          කියාලා
අටමා නොවෙද දුන් උපදෙස්     නවාලා
පහුරේ දමාගෙන ගොස් අතහැර දමාලා 
දුන් පබ්ලිසිටියට ආවායි බෝ     තුමාලා

ඔය විදිහෙන් පස්සේ තමයි එකා දෙන්නා කොළොම්පුරේට එබෙන්න විතරක් නොවෙයි ගොඩවැදිලා යන්නත් ආවේ. ඊටත් පස්සේ  

පිපුනා නෙළුමන් අතරේ මතුව       මඩෙන්
සම්මානත් ගත්තා පැනලා තරග     හිඩෙන්
වැඩුනා මිතුරුකම් උන්දැලා කරපු  වැඩෙන්
අවසන ආවේ කාගේද කරපිටක්     උඩෙන් 

ටිකෙන් ටික දවස් ගෙවිලා ගියා. නෙළුම්යාය මල්යාය වසන්තයවල් නැතිවෙලා ගිහිල්ලා වෙන්නැති පරණ බ්ලොග් උන්නෑහැලත් අවාරෙට වැටෙන පොල් ඇට්ටි වාගේ ඉදහිටලා පොස්ට් එකක් දෙකක් පුරසිද්ධ කොරලා දාන්නේ. ඉස්තරම් බ්ලොගක් ලිව්ව විචාරක තුමාත් අපෙන් සමුගත්තා. ඉන්න බ්ලොගාලත් දැන් සකර්බර්ග් ගොය්යාගේ බුකියේ පැලපදියම් වෙලා. ඒවාගේම කොළොම්පුරේට වැඩියෙන් බ්ලොග් කියවන්නන් ආපු ලංකීය සිතුවිලි සින්ඩියත් ලගකදි වැහිලා ගියා. මිනිස්සු මේව්වා බලන්නේ නැත්නම් හත්දෙයියනේ මොන කෙං ගෙඩියකටද කාලය මිල මුදල් හා ඩේටා වියදම් කරන් බ්ලොග් ලියන්නේ කියලාත් හිතෙනවා.    
කොමෙන්ටු නොදැම්මත් කියවන නෝනා මහත්තුරු ඔක්කෝම බොහෝම වැදගත් වාගේම බ්ලොග් ලියන එකාලට පොඩි ආතල් එකක් කික් එකක් මොටිවේෂන් පාරක් උත්ප්‍රෙරකයක් තල්ලුවක් දෙන්නේ කොමෙන්ටුවක් කොටන උන්දැලා තමයි. විශේෂයෙන්ම ප‍්‍රසන් නයා, ප‍්‍රාජේ, මෙන්ඩා වාගේ බ්ලොග් නොලියන එත් කියවලා කොමෙන්ටු කොටන මහත්තුරුගෙන්. 

එන්න එන්නම බ්ලොගාලත් අඩු    වෙනවා
ලිපියට ලැබෙන ප‍්‍රතිචාරත් මදි       වෙනවා
ඩේටා පුච්චාගෙන අපි තාමත් අල   වෙනවා
හිතුනොත් කොළොම්පුරේත් යන්නම යනවා

ඉතිං සිංහල බ්ලොග් ශානර අවකාශයේ එල්ලිලා රැදිලා ඉන්න කොළොම්පුරේට ගොඩවුනු එකී මෙකී නොකී සියලු දෙනාටම හර්දයාංගම ටැන්කිව් එක පුදකරන ගමන් හැමොටම සැලුට් එකක් එහෙම ගහලා ඉඩපාඩුවක් ලැබුන වේලාවක ආයෙත් මේ ගෙන්දගං පොළවේ හමුවෙන්න බලාගෙන කොළොම්පුරේ යන්න යනවා.

සිංහබාහුගේ ස්විකා සාදය. Tuica (tswee-ka) හා බොස්ෆරස් ඔස්සේ රුමේනියාවට

සිංහබාහුව මතකයට ආවර්ජනය වුයේ මීට පෙර ලියු බ්ලොග් පොස්ටුවක් සදහා මාගේ පැරණි ඡයාරූප ගොන්නක් යලි පරිගණක තිරය මත දිග හරිද්දිය. එකල ජර්මානු නැව් සමාගමකට අයත්වු  මා සේවය කල නෞකාවේ දෙවන එංජිනේරුවරයා ලෙසට පත්ව ආ රුමේනියන් ජාතිකයාට තිබු හතරුස් මුහුනත් නොඋස් ස්ථුල සිරුරත් මෙන්ම ඔහුගේ මදක් වැවුන රිදිවන් කොන්ඩය නිසාත් අපි විසින් රෙජිස්ටර් කල නාමය වුයේ සිංහබාහුය. විදේශිකයන්ට නොතේරෙන ලෙසින් ඔවුන් ගැන කතාකරන්නට ශ‍්‍රී ලාංකික අප යොදාගත්තේ සිංහල භාෂාවයි. ඔවුන්ගේ තනතුරු නාමය ඉංග‍්‍රිසියෙන් නොකියා ඉන්නට හැකි තරම් උත්සාහ කලෙමු. නෞකාවේ ඉන්ජිනේරුවරයාට මෝලේ දෙකා නමින් හදුන්වද්දි මොහුට අපි සිංහබාහු වශයෙන් කතා කලෙමු. දෙකාට සිංහබාහු ලෙසින් කවුරු නම තිබ්බාද දැන් නම් මතකයේ නැත. සමහර විට මා වෙන්නට පුළුවන. පසුකලෙක ඔහු මේ සමාගමේම වෙනත් නෞකාවක ප‍්‍රධාන එංජිනේරුවරයා ලෙසින් උසස්විම් ලබා පැමිනෙද්දි ඒහි සේවයේ සිටි මාහටද ඔහුත් සමගින් එක්වන්නට ලැබුනි. සිංහබාහු ඉතා හිත හොද මනුස්සයෙක් විය. සිංහබාහු යන නාමය අපටත් පහසුවුයේ රුසියන් හෝ බල්ගේරියන්කාරයින්ගේ දිව පටලැවෙන නම් උච්චාරනය අපහසුවු බැවිනි. 



අප සේවය කල නෞකාවේ ගමන් මාර්ගය වැටි තිබුනේ මැලේසියාව චිනය තායිවානය යලිත් මැලේසියාව ගොස් ලංකාව පසුකර රතුමුහුදට ඇතුලුවි ඊජිප්තුවටද ඉන්පසුව සුවස් ඇල (Suez Canal)  හරහා ගමන්කර මධ්‍යධරනි මුහුදේ සිරියාව ලෙබනනය ග‍්‍රිසියද ඉන්පසුව කළු මුහුදට (Black Sea ) ගොස් රුමේනියාව හා යුක‍්‍රීනය යන රටවල් වලට ගමන් කිරිමය. මේ සියලුම රටවල වරායන් වලට ගොස් යලිත් මැලේසියාව එනතෙක් එක ගමන්වාරයක් සම්පුර්ණ කිරිමට දෙමසකට අඩු කාලයක් ගතවුනි. ඒ අනුව ඔහුගේ රටවු රුමේනියාවේ කොන්ස්තන්තා වරායටද (Port of Constanța) මසකට වරක් යායුතුවිය.බෙලාරුස් බොස්නියාවහා හර්සගොවිනියාව  බල්ගේරියාව කෞඒශියාව ජෝජියාව හංගේරියාව මොල්ඩෝවියාව පෝලන්තය රුමේනියාව  රුසියාව සර්බියාව ස්ලෝවකියාව ස්ලෝවේනියාව තුර්කිය හා යුක‍්‍රීනය යන රටවල් ගනනාවකින් වටවු කළු මුහුදට පිවිසෙන්නට තිබුනේ එකම එක පටු සමුද්‍ර මාර්ගයක්පමණි.

ඒ තුර්කියේ ස්තාන්බුල් අගනුවර පසුකර බොස්ෆරස් සමුද්‍ර සන්ධිය (Bosphorus strait ) ඔස්සේය. ඉතාමත් ආකර්ෂණිය සුන්දර පටු මුහුදු මාර්ගයක්වු එහි ගමන් කරද්දි මුහුද අද්දරට වෙන්නට කදු ගැටයන් හි ඉදිකර ඇති ඉපැරනි බලකොටුද මුහුද අද්දරට වෙන්නට ඉදිකර ඇති හොටල් හා අවන්හල්ද හොදින් දර්ශණයවෙයි. එසේම ස්තාන්බුල් නුවරට ආසන්නයේදි ඇතින් පෙනෙනා සුවිශාල මුස්ලිම් පල්ලිද ඉවුරු දෙක යාකරමින් ගොඩනගා ඇති දැවැන්ත පාලම් යටින්ද කුඩා බෝට්ටු හා මගිප‍්‍රවාහන නෞකාවන් පසුකරමින් ගමන් කරන්නට සිදුවෙයි. සෞම්‍ය කාලගුණයක් ඇති රාත‍්‍රි නොවන බොහෝ අවස්ථාවලදි නැව් තට්ටුවට පැමිණ මෙම සුන්දර පටු මුහුදු මාර්ගය පසුකරයන අයුරු බලා සිටින්නට අසාකලෙමි. 

බොස්ෆරස් පසුකර කළුමුහුදට ඇතුලුවන නෞකාවේ ඊලග නැවතුම වන්නේ රුමේනියාවේ කොන්ස්තන්තා වරායයි (Port of Constanța). විශාල වරායක්වුවත් ඇතුලත නැව් තිබුනේ සීමිත ගනනක් බව මගේ මතකයයි. ජැටියන් හි තිබු පැරණි දොඹකර සිහිපත් කරන්නේ වෙලක මාලුන් ඩැහැගන්නට බෙල්ල නවාගෙන බලා සිටිනා කොකුන් රූනක් සේය.  කොන්ස්තන්තා හි නැව් ගොඩනගන ෆිප්යාඩ් එකක්ද විය. පැරණි කොමියුනිස්ට් රටක්වු රුමේනියාවේ කොමියුනිස් ක‍්‍රමයේ ගරාවුටුනු නාෂ්ඨාවිශේෂ ලෙසින් මේ වරායත් දොඹකරත් සිහිපත් කරවන්නට වුනි. එකල නැගෙනහිර යුරෝපයේ තිබු විශාල හා නෞකාවන් විශාල වශයෙන් ආගිය වරායක් ලෙසින් පැවතුනායි අසන්නට ලැබින. අප කොන්ස්තන්තා වරායට ගොඩබට හැටියෙම සිංහබාහු ලකලැස්තිවෙන්නේ තම නිවෙසට යන්නටයි. 

රුමේනියාවේ කොන්ස්තන්තා වරාය (Port of Constanța)

සාමාන්‍යයෙන් රුමේනියාවේ කොන්ස්තාන්තා වරායේ අපගේ නෞකාව පැය විසිහතරකට වඩා නවතා තිබෙන අතර කොළඹ වරායේ මෙන් බහාලුම් ගොඩබෑම් හා පැටවිම් සිඝ‍්‍රගාමිව සිදුනොවිනි.  නෞකාව පිටත්විමට පැය කිහිපයකට පෙර නිවෙස බලාගිය සිංහබාහු යලි ටැක්සියකින් හෝ ඔහුගේ බිරිද විසින් පදවාගෙන ආ මොටර් රථයකින් ආපසු ආවේය. මාගේ මතකයේ සටහන්වි තිබු අයුරින් එම මොටර් රථය රුසියාවේ නිෂ්පාදිත ලාඩා මොඩලයේ මොටර් රථයක් විය. නිවසින් රැගෙනා  බඩුමුට්ටු අතින් කටින් එල්ලාගෙන නැවේ ගැන්ග්වේ (Gang way) එක නගිනා සිංහබාහු ඩෙක් එකට පැමින හතිිදමන්නට පටන් ගනියි.අසල සිටිනා කවුරුන්හෝ උදව්වට කතා කරගන්නා ඔහු රථයේ  ඩිකියේ අසුරාගෙන ආ ලිටර් පහේ හෝ ලීටරයේ ප්ලාස්ටික් ජල බෝතල් දෙක තුනක් නැව තුලට ඔසවාගෙනවිත් දෙන මෙන් ඉතා බැගැපත්ව ඉල්ලා සිටියි. 
රුමෙනියාවේ වරායෙන් පසුව අප නෞකාවෙ ඊලග නැවතුම වුයේ යුක‍්‍රීනයයි. ඔඩෙසා වරාය (Odesa)  හා ඉලිචෙවුස් වරායන්( port of ilyichevsk) හිදි බහාලුම් පැටවිමෙන් හා ගොඩබෑමෙන් පසු කළුමුහුදෙන් පිටතට පැමින මධ්‍යධරණි මුහුදටත් ඉන් පසුව සුවස් ඇල හරහා රතු මුහුදටත් පැමිනෙන තෙක් කාලය තරමක විවේකය අඩු කාර්‍යයබහුල කාලසිමාවක්විය. එහෙත් ඉන් පසුව උදාවෙන දිර්ඝමුහුදු ගමන  රතුමුහුදේ සිට ඉන්දියන් සාගරය හරහා මැලේසියාව දක්වා දින හත අටක කාලය තරමක් විවේකි කාලසිමාවක්විය. මෙම නෞකාවේ සේවයේ නියතු කාර්්‍යමන්ඩලයේ වැඩි දෙනෙක් ලාංකිකයෝ වුවත් එන්ජින් දෙපාර්තුමෙන්තුවේ ලාංකිකයන් සිටියේ මා ඇතුලුව තවත් දෙදෙනෙකු පමනකි. දකුනේ මාතරින් ආ දිනේෂ්ද මා මෙන්ම අවිවාහකයෙකුවු අතර නුවරින් ආ ඒකනායකද නාවික හමුදාවේ සේවයෙන් ඉවත්ව වෙළද නාවිකයෙකු ලෙසින් එකතුවු විවාහකයෙකු විය.අප හැරෙන්නට අනෙක් අය වුයේ හයේ හතරේ හැඩි දැඩි එහෙත් පොඩි එකෙක් මෙන් අහිංසක පුට්ටුවා නමින් අප හදුන්වපු ෆිටර්වරයාත්  (Fitter) හද්දා  නාකියෙක්වු විදුලි ඉන්ජිනේරුවාත් පෝලන්ත ජාතිකයන් වු අතර හතරවැනි ඉන්ජිනේරුවරයා රුසියානුවෙකු විය. රතුමුහුදට වැටි ඇරඹුනු දිර්ඝ මුහුදු ගමනක් ඇතුලත එක්තරා දිනෙක සිංහබාහු නොහොත්  අපගේ දෙවන ඉංජිනේවරයා මා ඇමතිය. මාහට සවස් කාලයේ වැඩක් නොමැති නම් අනෙක් දෙදෙනා සමගින් තම කැබිනයට පැමිනෙන මෙන් ඉල්ලා සිටියේය. සිංහබාහුගේ ඉල්ලීම දිනේෂ්ට හා ඒකනායකට පවසා සවස 5ට සේවයෙන් මිදි ගියෙමි. 


රාති‍්‍ර ආහාර වේලෙන් පසුව කැබිනයට වි ටිකක් ඇලවි සිටි බැවින් වෙලාව ගතවෙනවා දැනුනේ නැත. සිංහබාහුගේ ඇරයුම මතක්වුයේ දුරකතනය නාදවෙද්දිය. දිනේෂ් අනෙක් පසින් මා අමතා තමා ඉන්නේ සිංහබාහුගේ කැබින් කාමරයේ බවත් ඉක්මනින් එහි පැමිනෙන ලෙසින් කිවෙය. ඉක්මනින් ටී ෂර්ටයක් දමාගත් මා ඊලග තට්ටුවේ තිබු සිංහබාහුගේ කැබිනය වෙත පිය නැගුවෙමි. දොරට තට්ටුවක් දමා එයට ඇතුල් වෙද්දි මා දුටුවේ අපගේ මුළු එන්ජින් කාර්්‍යයමන්ඩලයසිංහබාහුගේ කැබිනයේ අසුන්ගෙන සිටින බවය. ඒ වන විටත් අරඹා ඇති සාදයේ මා ඔවුන් සමගින් එක්වුවිට එතැන නොසිටියේ ප‍්‍රධාන ඉංජිනේරුවරයා පමණි. සිංහබාහුගේ මෙසේ කොන්තන්තා  වරායෙන් නිවසට ගොස් රැගෙන ආ ප්ලාස්ටික් ජල බෝතල් ටීපෝව උඩ තිබුනි. කටගැස්ම සදහා ටීපෝව මත තිබු දුම්ගසන ලද අමු මාළුද (Smoked Fish) වයිට් චිස්ද (white cheese)පෙති කැපු හොම් මේඩ් සලාමිද (Salami) විය. ඌරු මාංශ පුරවා සොසේජස් මෙන් සකසා පවනේ වියලා ගත් සලාමි හැඩය දැක්කාම සිහිපත් වෙන්නේ වෙලුනු බලු බෙට්ටක් ය. 

සලාමි (Salami)

සිංහබාහු ගෙන ආ ප්ලාස්ටික්  ජල බෝතල් වල තිබුනේ රුමෙනියානුවන් විසින් නිවසේ පිලියෙල කරගන්නා ස්විකා නම් Tuica (tswee-ka) මත්පැන් බවත් කිසිදු මිශ‍්‍ර කිරිමකින් තොරව අමුවෙන්ම බිම ඔවුන්ගේ සිරිත බවත් ඔහු අපසමගින් පැවසීය. නොදන්නා මත්පැන් පානය කිරිමෙන් පසුවදාට විදින්නට සිදුවන දුක් කරදරයන් ගැන හොදහැටි අත්දැකීම් ඇති බැවින් සිංහබාහුගේ ස්විකා බොන්නට අදිමදි කලෙමි.එසේම කිසිදු බියක් වන්නට හේතුවක් නොමැතිබවත් හෙට උදේට මාර ෆිට් එකක් ඇතිව වැඩ කිරිමට හැකි බවත් මේවා ගෙදර නිපදවාගන්නා දේවල් නිසා තම බිරිදද පානයකරනා බවත් සිංහබාහු කීය. රෝමයට ගියා නම් රෝමන් කාරයෙකු සේ හැසිරිය යුතු බැවින් සිංහබාහුගේ ඉල්ලීම මත විදුරුවකට වත් කරගත් ස්විකා ටික ඔසවා සියල්ලන්ටම ජයපතා උගුරට වත්කරගතිමි. ගලනාලය කකාරවාගෙන ස්විකා ගලාගෙන ගියේ කට කජුලෙල්ලක් සේ අපි‍්‍රයාවෙන් අඹරවාගෙනය. වයිට් චිස් කැල්ලක් කටට දා ගත් නමුත් කටේ ඇතිවු අවුල නැතිවුයේ නැත. අප පුට්ටුවා නමින් හදුන්වන නෞකාවේ ෆිටර් වරයා දුම්ගසන ලද මාලු කැල්ලක් කන ලෙසින් මාලු තසිම පිලිගැන්විය. කරවල වෙන්නට තරමට නොවෙලුනු  දුම්ගැසු මාලුන් ප‍්‍රමාණයෙන් සාලයන් තරමේ එවා විය. කිසිදා ආහාරයට නොගත් දුම් ගැසු තැම්බුනු අමු මාළු කැල්ලක් කඩාගෙන විකුවෙමි. එහිවුයේ  අමුතු රසයකි.


ස්විකා අමුවෙන් පානය කරන්නට බැරිය කියු දිනේෂ් තම කැබිනයට ගොස් මිශ‍්‍ර කරන්නට  කොකාකෝලා කෑනයක් රැුගෙන ආවේය. එකනායකද කොකා කෝලා මිශ‍්‍රකරමින් ස්විකා පානය කරද්දි මා රුමේනියානු සිරිතට ගරුකරමින් අමුවේනම පානයක කරන්නටවිමි. පලමු විදුරුව තරම් අමාරුවක් දෙවැනි හා තුන් වන විදුරුවේ දි දැනුනේ නැත. සලාමි හා වයිටි චිස් ද ස්මා්ක් ෆිෂ් කමින්ද එකිනෙකාට විහිලු කරමින් සාදය ගෙවියද්දි  අමුවෙන් බිපු ස්විකා මත මා මාගේ  ලිමිට් එක ආසන්නයේ සිටිනා බව විඥාණයට අනතුරු අගවන්නට වුනි. වැඩේ හමාර කර මා පිටත්ව යන්නට උත්සාහ කලත්  සිංහබාහු ඇතුලු අපේ නඩය ඉඩදෙන්නේම නැත. බීපු ස්විකා හොදට පදම්වෙද්දි  සිංහබාහුටත් නොකියාම මාරුවි වැනිවැනි අමාරුවෙන් කැබිනයට ගොස් ඇදේ වැටුනි. මා යලි අවදිවුයේ පසුදා සේවයට යන්නට එලාමය වැදුනු පසුවය. ඔළුවට දෙකේ දෙකේ පොල්ලකින් ගැසුවාක් මෙන් හිස කෙලින්කරගන්නට බැරිය. ඇදෙන් බිමට බැහැගන්නට නොහැකියාවෙන් පෙලෙන්නට විමි. තදබල හිස රුදාවත් ඇගපත අමාරුවත් තිබුනත් කෙසේහෝ මෙස් එකට ගොස් තේ එකක් හාදාගෙන පානය කර එන්ජින් කාමරයේ පාලක මැදිරියට වාර්තා කලෙමි. ඒවන විට දිනේෂ් පැමින සිටියත් ඒකනායක පැමිණියේ ප‍්‍රමාදවිගෙනය. වෙනදා අපටත් කලියෙන් පාලක මැදිරියට විත් ප‍්‍රධාන ඉන්ජිනේරු සමගින් කෝපි කෝප්පයක් පානය කරමින් සිටිනා සිංහබාහු හෝ හතරානොවිය. එසේම පෝලන්ත ජාතික විදුලියා හෝ පුට්ටුවාද සිටියේ නැත. සිටිය එකම පුද්ගලයාවුයේ සිංහබාහුගේ සාදය නොදන්නා එයට නොපැමිනි ප‍්‍රධාන ඉන්ජිනේරුවරයා පමණි.වෙනදා ප‍්‍රබෝදමත්ව සිටිනා පිරිස කෙලින් කටින් හිටගන්නටත් බැරිව මැලවි සිටිනා අයුරු දුටු චිෆ් ගේ ඇස් උඩගියේය. 
තම අංශයේ සගයන් පෙරදා රාති‍්‍රයේ මොකක් හරි මගෝඩිවැඩක් කර ඇතිබව ඔහු අප දැක්මෙන් තේරුම්ගත්තේය. වැඩට නොපැමිනි අනෙක් අයගැන සොයා බැලිමෙන් පසුව මා වෙත පැමිණි ඔහු තමන්ටද නොකියා ඊයේ උඹලා මොකක්ද කලේ යැයි විමසීය. කිසිවක් නොකියා මද සිනාහවක් පෑමක් විතර කිරිමෙන් ඔහුට තේරුම් යන්නට හැරියෙමි. 
"උඹලා මොනවාදැයි බිව්වේ?" 
දිනේෂ් ලගට ගිය ඔහු ඇසීය.
"සෙකනඩ් ඉන්ජිනියර් ගෙනාපු ස්විකා."
"මයිගෝඩ් උඹලාට පිස්සුද ස්විකා ජරාවල් බොන්න. උඹලා ඔක්කෝටම දැන් හොදටම  අමාරු බවනම් පේනවා. අද වැඩි වැඩක් නැති නිසා රෙස්ටි එකේ ඉන්නයි" කී ඔහු කෝපි කෝප්පය  තොලගාන්නට විය. කොන්ට්‍රෝල් රූම් එකෙන් එලියට ආපසුව මා වෙත පැමිනි ඒකනායක පැවසුවේ ඔහුගේ පපුව රිදෙන බවත් වැඩක් කරන්නට තියා කෙලින් හිටගෙන ඉන්නටවත් බැරි බවය. ස්විකා බි පපුවේ අමාරුවක් හැදෙන්නට බැරි බැවින් ඒ ගැන විමසද්දි ඔහු කිවේ සිංහබාහුගේ සාදය අතරතුර හා පසුව බොහෝ සිදුවිම් ගොඩාක් වුනු බවයි. 
මා වෙරිමරගාතේ කැබිනයට ගිය පසුව නාකි විදුලි ඉන්ජිනේරුවරයා හැඩි දැඩි පුට්ටුවාගේ බිරිද ගැන කියු මොකක්දෝ විහිලුවකට අරඹයා කරගත් වාදය පසුව දබරයකින් අවසන්වෙන්නට ගිය බවත් අමාරුවෙන් ඔවුන් දෙදෙනා වෙන්කර කැබිනයට යවා සාදය හමාර කෙරු බවයි.  පසුව ඒකනායක සිගරට්ටුවක් ඉල්ලා ගැනිමට දිනේෂ් ගේ කැබිනයටගිය බවත් ඔහු එහි නොසිටිය හෙයින් පහල මෙස් එකට ගිය විට එහි සිටි දිනේෂ් බදාගන්නට මෙන් කෑගසාගෙන දිව විත් ගොනෙක් අනින්නාක් සේ ඔලුවෙන් පපුවට ඇන්න බවත්ය. ඒ ඇන්න පාරට පපුව සිරවිමක් එක්කම සිහි නැතිවුවාක් මෙන් දැනුන බවත්ය. බිපු වෙරි මතය සියල්ලම නැතිවි ගියත් පපුවේ අමාරුව තවමත් තිබෙන බවත්ය. සිංහබාහුගේ සාදයෙන් දිනේෂ් මෙස් එකට ගොස් ඇත්තේ හපන්නට දෙයක් සොයාගැනිමට බවත් හොදටම වෙරිමරගාතේ  ඔහු කල කී දෙයක් වත් ඒකනායකට ඔළුවෙන් ඇන්න එක මතක නැතිබවත් එත් තදින් හිස ඇදුම්කන බවත් දිනේෂ් මේ සිද්දිය ගැන අසද්දි කිවේය. කෙසේ නමුත් එදා දහවල් වනතෙක්ම සිංහබාහු හා විදුලියා හා පුට්ටුවා වැඩට නොපැමිනි අතර අමාරුවෙන් ඉන්නා අයව එන්ජින් අංශයේ තබා ගැනිමට නොහැකි බැවින් දහවල් කෑමන් පසුව වැඩට නොපැමින ගිහිල්ලා නිදා ගන්නා ලෙසින් චීෆ් ගෙන් උපදෙස් ලැබින. පසුදා ප‍්‍රධාන ඉන්ජිනේරුවරයාගෙන් අපට ස්විකා බොන්නට දිම ගැන හොදහැටි බැනුම් ඇසු සිංහබාහු යලි කිසි දිනෙක කොන්තන්සා වලින් ගෙදර ගොස් ස්විකා ගෙන ආවත් අපට කතාකර සාදයන් දැම්මේ නැත.  

කහ පැහැති ටිෂර්ටයක් ඇදසිටින්නේ සිංහබාහුය.ඔහු ලගින් ටයිගර් බියර් කෑනයක් අතැතිව ඉන්නේ මංතුමායි.

බොමුද ටෙකිලා

උඹ ටෙකිලා ගහලා තියේනවාද?
ටෙකිලා ඒ මොකක්ද?
පිස්සු හැදෙනවා බං ගැහැව්වාම ලොවෙත් වදිනවා කන් පාත්වෙන්න
මොකක්ද බං දුමක්ද?
නෑ බං අරක්කු ජාතියක්
ඇහැව්වෙත් අදමයි එච්චරටම සැරද?
අපේ අයියාකාරයා අරන් ආවේ සැන්ඩි නැතිව අමුවෙන් ගහන්නලු ඔනේ.
 ලුණු ටිකක් පිටිඅල්ලට දාලා කාලා ඊට පස්සේ දෙහි කැල්ලක් හපනවා විතරයි බයිට් එකට.  වැදෙනවා බං නැතිවෙන්න.

ඔන්න ඔහොම තමයි මමත් ටෙකිලා Tequila ගැන මුලින්ම ඇහැව්වේ. හැබැයි අහලා තිබුනාට ටෙකිලා ටිකක් කටේ තොලේ ගාගෙන බොන්න ලැබුනේ මැක්සිකෝවට පැත්තට ගොඩබැස්සාට පස්සේ තමයි. දැන්නම් ලංකාවෙත් ටෙකිලා තියෙනවා.හැබැයි ඔරජිනල් ටෙකිලාද දන්නේ නෑ. මදක් අවර්ණ ටෙකිලා බෝතලයක් අරන් පොඩි ශොට් විදුරුවක් පුරවලා නිට් ගහලා ලුණු ටිකක් පිටි අල්ලට දාගෙන ලෙවකාලා ඊට පස්සේ දෙහිකැල්ලක් හැපුවාට අපේ මිත‍්‍රයන්ට නම් ටෙකිලාත් සැන්ඩි නොකර බොන්න නම් බැරිවුනා.  මීට මාස කිහිපයකට පෙරදි අහුන්ගල්ල පැත්තේ තියෙන තරුපහේ හොටලයකදි ආපහු ටෙකිලා විදුරුවක් දෙකක් විතර රසබලද්දි මට මතක්වුනේ මොනවාද මේ ටෙකිලා කියන්නේ? එකේ ඉතිහාසය මොකක්ද කියලා හොයලා බලන්න. ඔන්න ඉතිං පස්සේ අන්තරජංජාලය පිරලා ටෙකිලා ගැන හොයාගත්තු දෑ කොළොම්පුරේටත් දාන්න හිතුනා.

ටෙකිලා මුලින්ම නිපදවලා තියෙන්නේ 16 වන ශත වර්ෂයේදි පමණ මෙක්සිකෝවේ ටෙකිලා නගරයේදි (City of Tequila)  තමයි. මේ ටෙකිලා නගරයේ තියෙන ගිනිකදු ආශි‍්‍රත රතු පසේ (Red Volcanic soil)වැවෙන නිල් අගාවේ (Blue Agave) පැලෑටියෙන් තමයි මේ ටෙකිලා නිපදවන්නට පටන්ගත්තේ.

මුල් කාලිනව අගාවේ පැලෑටියේ සාරය පැසිමට ලක්කර සාදන පුල්කේ නම් වු පානය තමයි ඔවුන් පානය කෙරුවේ. මැක්සිකෝව අල්ලාගත් ස්පාඤඤයින්ගේ බ‍්‍රැන්ඩි තොග අහවරවිම නිසා මිදිසාරය ආසවනය කිරිමෙන් බ‍්‍රන්ඩි නිපදවාගන්නවා සේ මේ පුල්කේ ආසවනය කිරිමෙන් දේශිය නිපදවන පානයක් සේ ටෙකිලා නිපදවා ගන්නට ලැබුනා. හරියට අපේ රටේ දේශිය පානය කසිප්පු වාගේ.
දොන් පෙඩ්රෝ සැන්චෙස් (Don Pedro Sánchez de Tagle) නම්වු වංශාධිපතියා විසින් ජලිස්කෝ (Jalisco)ප‍්‍රදේශයේ විශාල පරිමානයෙන් ටෙකිලා නිපදවන කර්මාන්තශාලාවක් පිහිටුවාලුවයි කියනවා. තව දිව පටලැවිලා උලුක්කුවෙන ජාතියේ නම් තියෙන මැක්සිකානු අප්පුහාමිලා විසින් මේ ටෙකිලා නිෂ්පාදන ක‍්‍රම වැඩිදියුණු කරලා ජාත්‍යන්තරයටත් ටෙකිලා අරගෙන ගියා. ඔන්න එකට අපේ රට වෙලේ, කැලේ, ලන්දේ, අකුලේ, ගං ඉවුරේ විතරක් නොවෙයි මහා සුපිරි මන්දිර වලත් පෙරන වෙල් පැන්ටා, ගහපං මචං, බොකු දිරාස්, ඇතිහිටියා, කසියා, හැලි අරක්කු කියලා නානාප‍්‍රකාර නම්වලින් හදුන්වන දේශිය පානයට නම් කිසිම සපෝට් එකක් නම් නෑ ජාත්‍යන්තරයට අරන් යන්න. බොකු දිරාස් වලට කියන තව නම් එහෙම තියෙනවානම් කොළොම්පුරේටත් දන්වන්න හොදේ
එහෙනම් බලමු කොහොමද ටෙකිලා නිපදවන්නේ කියලා.
මුලින්ම කිව්වා වාගේ ටෙකිලා නිපදවන්නට නිල් අගාවේ සහ අගාවේ පැලෑටිය වගාකරගන්නට ඔනේ.  අගාවේ පැලෑටිය වාගාකරන්නන් හොද එක්ස්පර්ට්ලා. මේ වගාකරුවන් හදුන්වන්නේ jimadores නමින්. එයාලා විසින් නිරන්තරයෙන්ම එවා කප්පාදු කරමින් අස්වැන්න නෙලන කාලය තෙක් හොදින්  රැක   බලාගන්නවා. නියමිත ලෙස වැඩුනු අගාවේ පැලෑටිය කොවා (coa) නම්වු දිගු මිටක් සහිත විශේෂිතවු පිහියකින් මෙම අගාවා පැලෑටියේ අතු කපා දමා එහි මාංශලයෙන් පිරුනු කද කොටස වෙන්කරගන්නවා.

 නියමිත ලෙස වැඩුන කද කොටසක බර කිලෝ 70 සිට 110 ක් දක්වා පමණ වෙනවා කියනවා. වෙන්කරගත් කද කොටස් උදුන් වල බහා මදක් බේක් කරගන්නවා. ඒ කරන්නේ එහි අඩංගු පලතුරු සිනි පෘක්ටෝස් වෙන් කරගැනිමටයි. ඉන් අනතුරුව   ටහොනා ( tahona ) නම්වු විශාල ගල්රෝදයක් මගින් කැලිවලට ඉරා හා පොඩිකරගත් අගාවා කද කොටස් අඹරා යුෂ වෙන්කරගන්වා.

 ඉතිරිවන පල්පයන් සත්ව ආහාර කඩදාසි සැදිම හා කොම්පොස්ට් පොහොර වැනි කාර්්‍යන්වලට යොදා ගැනිම සිදුකරගන්නවාලු. වෙන්කරගත් යුෂ විශාල සුදු යකඩ හෝ ලී වැටි වල ගබඩාකර දින කිහිපයක් පැසිමට හරිනු ලබනවා.

මෙසේ පැසිමට ලක් කෙරුනු අමු බිර වැනි මෙම ආගාවේ යුෂ දෙවරක් පෙරා ආසවනය කිරිමෙන් ටෙකිලා නිපදවාගන්නවා. සමහර නිෂ්පාදකයින් තුන්වරටද මෙවා පෙරාගන්නවා. තෙවරක්පෙරුව මිසක් තෙවරක්පෙරුම නොවෙයි වරද්දගන්න එපා. මෙසේ පොරාගත් ටෙකිලා කෙලින්ම බෝතල් කිරිම හා ඔක් ලියෙන් සාදනු ලැබු  බැරල්වල ගබඩාකර ගැනිමෙන් පැරණි කරගන්නවා.  මේ නිසා ටෙකිලා වල පාට රසය හා සැර වෙනස්වෙනවා. මෙහිදි අවර්ණ පැහැයේ (සිල්වර්) සිට කහපාටට හුරු දුබුරු පැහැය (ගොල්ඩන්) දක්වා වර්ණ වෙනස්වන ටෙකිලා තියෙනවා. ඒ නිසා ටෙකිලා ප‍්‍රභේද හතරක් ලෙසට වෙනස් වෙන්නේ කොහොමද බලමු.
පෙරිමෙන් පසුව බොතල් කිරිම හෝ සුදු යකඩ හෝ සුදු ඔක් ලී බැරලයන්  තුල මසකට අඩු කාලයක් පැරනි කරගත් ටෙකිලා බලැන්කෝ (Blanco) හෝ ප්ලාටා (plata) හෝ සිල්වර්  ("silver") ටෙකිලා නම් කෙරේනවා.
අවම වශයෙන් මසක් හෝ උපරිමයෙන් වසරක් පැරනිකරගත් ටෙකිලා රෙපොසඩෝ (Reposado) ටෙකිලා නමින්ද
අවම වසරක් හෝ උපරිම වසර තුනක් කුඩා ඔක් බැරලයන් තුල පැරනි කරගත් ටෙකිලා අනෙජෝ (Añejo) ටෙකිලා නමින්ද
වසර තුනකට වඩා වැඩියෙන් ඔක් බැරලයන් තුල පැරනි කරගත් එක්ස්ට‍්‍රා අනෙජෝ(Extra Añejo)  ටෙකිලාද වෙනවා.
හදන හැටි මොකටද බිව්වාම වදිනවානම් නේද
එහෙවනම් බොන හැටි බලමු
සාමාන්‍යයෙන් ටෙකිලා බෙන්නේ අමුවෙන් නැත්නම් නිට්. බයිට් නෑ ඒ වෙනුවට  ලුණු ටිකක් ලෙවකාලා පෙති කපපු දෙහි කෑල්ලක් තමයි හපන්නට වෙන්නේ. මෙක්සිකෝවේ බන්දෙරා ක‍්‍රමයට බිමත් එක ක‍්‍රමයක්. හැබැයි එහෙම බොන්නට නම් එක්කෝ මැක්සිකෝවට හරි නැත්නම් රියල් මැක්සියානු අවන්හලකට යන්න වේවි. අපේ ගෙවල් පැත්තේ මැක්සිකානෝ කියලා මැක්සියානු අවන්හලක් දැම්මා. ටොටියා ටැකෝ හරි බුරිතෝ, Guacamole ඇතියි කියලා කන්න බලාගෙන එකට ගොඩවුනාම අපරාදේ කියන්න බෑ එකේ තිබුනේ ෆයිඩ් රයිස් ආප්ප සහ කොත්තුරොටි  තමයි. මෙව්වාත් නිකං අටපට්ටම් අකුරු ටිකක් ගහපු  චිනෙත් නැති චයිනිස් කඩවල්  වාගේ තමයි  ඉතිං.
 බන්දේරා කියන්නේ ස්පාඤඤ භාෂාවෙන් කොඩිය (Flage) කියලායි.ඔය මැක්සිකන්කාරයෝ තමන්ගේ සාප‍්‍රදායික අහාර බොහෝමයකට ජාතික කොඩියේ පාට තුන යොදාගන්නවා. අපේ රටේ එහෙම කලානම් බුකි ජාතිආල දේශපාලුවෝ කරපු එකාගේ පතුරුයවනවා.

මැක්සිකෝ කොඩියේ පාට අනුව බන්දේරා පිලිගන්වනවා. පොඩි ෂොට් ග්ලාස් තුනක් යොදාගෙන කොලපාට නියෝජනය කරන්නට දෙහි යුෂත් සුදු පැහැයට සුදු ටෙකිලාත් රතු පාටට සංගරිතාත් ( sangrita) තමයි පිලිගන්වන්නේ.

 තවත් බොහෝමයක් සුප‍්‍රසිද්ද කොක්ටේල් වර්ග වලට ටෙකිලා මිශ‍්‍රකරන්නට යොදාගන්නවා.   මාගරිටා විදුරුව හෝ ස්පාඤඤ බාසාවෙන් කුඩා අශ්වයා නමින් හදුන්වන කැබල්ලිටෝ ෂොට් ග්ලාස් caballito (little horse, in Spanish)  එක තමයි ටෙකිලා බොන්න ගන්නේ. 

එහෙනම් දැනට ඔය ඇති. මිට වඩා දන්න විස්තර ඇත්නම් කොළොම්පුරෙත් දැනුවත් කරන්නකෝ.

ඔන්න අන්තිමට දැම්මේ මංතුමා මැක්සිකෝවේදි ගත්තු මැක්සියානු සිතියමක හිටිය ඉසව්වට පෙන්නාගෙන ඉන්න පොටෝ කෑල්ලක්.

රජගෙදර කලාකෘති.

රජතුමෙක් කිසිදා වාසය නොකරපු රජගෙදරක් අපේ රටේ තියේනවා. කාලෙකට ඉස්සර කිංස් හවුස් කියපු මන්දිරය පස්සේ කාලෙක කුවින්ස් හවුස් වුනා. ඊටත් පස්සේ ප‍්‍රසිඩන්ට් හවුස් නැත්නම් ජනාධිපති මන්දිරය නමින් හදුන්වන්න පටන් ගත්තා. මේ සිරිලංකා ප‍්‍රජාතන්ත‍්‍රවාදි සමාජවාදි ජනරජයේ පළමු ජනපති වු විලියම් ගොපල්ලව ගෙන් පසු මෙතෙක් බලයට පත්වු එකදු ජනපතිතුමෙකු එක රැයක් වත් මේ මැදුරේ ඉදලා නෑ ( දන්නා තරමින්) ඔය රජ ගෙදර ඉතිහාසය ගැන ආයෙත් කියන්න ලියන්න ඔනේ නෑ. මෙන්න මෙතැනින් ජනපති මැදුර ගැන කොළොම්පුරේ ලියපු ලිපිය බලාගන්න පුළුවනි. එහෙනම් මොන අටමංගල්ලයක්ද මේ ලියන්නේ? ලියන්න දෙයක් නෑ බලාගන්නයි ඔය පොටෝ කෑලි පහලින් එල්ලලා තියෙන්නේ. 
 ජනපති වාසය නොකලාට මේ නිලනිවසේ බොහෝ වටිනා මිල කලනොහැකි පෞරාණික මෙන්ම අගනා කලාකෘති වලින් පිරිලා තියේනවා. සමහරක් ජනපතිලා ධුරයේ කාලය අවසන් වෙලා යනකොට මේ වටිනා භාන්ඩ හා කලාකෘතිත් අස්ථාන ගතවෙලා ගිහිල්ලා තිබුනා. ජනපති මැදුරේ තිබු ඉතා විටිනා චිත‍්‍රයක් ආපහු මතුවුනේ ලංඩනයේ චිත‍්‍ර වෙන්දේසියකින්. (ඒ චිත‍්‍රය තිබුනේ මුල්කිරිගල විහාරයේ දර්ශණයක් කියලා තමයි මතක)  
හැබැයි ඒ චිත‍්‍රය ජනපති මැදුරේ නම් තියේනවා දැක්කේ නෑ. බොහොමයක් චිත‍්‍ර ඇදලා තිබුනේ ජොර්ජ් කීට්,  මංජු ශ‍්‍රී ,නයනාන්ද,  සිවලි,  ස්ටැන්ලි කිරින්දේ යන අතිදක්ෂ ආටිස්ලා තමයි.  එහෙනම් චිත‍්‍ර බලලා රජගෙදර රවුමක් ගහමු.