Saturday, October 28, 2023

අරගලයේ මරගලය (ශනිදා දහයට III)

 අරගලයේ මරගලය




දැන් ජිවත්වෙන්න අමාරු නේද? උද්ධමනය ඉහල ගිහිල්ලාලු.  මේ වෙනකොට මේ අවුරුද්දට  ලයිටි බිල් තුන්පාරක් වැඩිකරා. ජල බිල් ගෑස් වියදම ඉන්ධන වියදම් බස් ගාස්තු ඇතුලු ප්‍රවාහන වියදම් ඔක්කෝම වැඩිවෙලා නේද?  උබලාට ලැබෙන සොච්චම් පඩියෙන් මේ බිල් ගෙව්වාම කන්න බොන්නත් ඉතුරුවක් තියේනවාද?  අපේ දේශපාලුවන් අපිව නොමරා මරනවා නේද?
ඇයි ඒ?
 බොලාට අමතක උනාද?
 තොපිලා ඔක්කෝම එක්කාසුවෙලා රටබේරා ගන්නය කියලා 69 ලක්සයක  චන්දේ දිලා පත්කරගත්තු ජනාධිපති ගොඨා ටික කලකින් එපාවුනා නෙව.  ඊට පස්සේ පොරව එලවන්න ගොල්ෆේස් ගිහින් go home gota කියලා ටැග් ගහන් දැගලුවා.  සමහරු කුඩාරම් ගහගෙන එතැනම ලැග්ගා. අලුත් ගමකුත් හැදුවා. තව සමහරු නොමිලේ බිරියානි කන්න ගියා. නිලියෝ නළුවෝ ඇවිත්ගියා. ගායක ගායිකාවෝ සින්දු කිව්වා. සමහරු චිත්‍ර ඇන්දා.  පුස්තකාල තියන් පොත් කියෙව්වා නිරාහාරව ඉදන් උපවාස කළා. පවුල් පිටින් ගොල්ෆේස් ගිහින් ජාතික කොඩිය වන වන ඉදලා ආවා.  එකි මෙකි නොකි හැමදේම කළා උනුත් අතහැරියේ නෑ, එක එක් දේවල් කොලා.. මයිනා ගමේ කන පැලෙන්න පිරිත් ඇස්සුවා.. තව කඩලවාත් නැති කොන්ඩම් පැකට් ගෝල්ෆේස් පිට්ටනියේ දැම්මා . ඔය අස්සට ඔත්තුකාරයොත් රිංගෙව්වා.

 ඔන්න එක දවසක් ආවා නොන්ඩි ආතාගේ බලලෝභි කම වැඩිපුර ඉස්මතුවෙච්චි. අතා පොඩි රැස්වීමක් තිබ්බා. පොඩි කිව්වාට පොඩිමත් නෑ. ආතගේ හෙංචයියන්ගේ මැර කන්ඩායමට ආතා පොඩි කික් එකක් දුන්නා. ඒකෙන් ෆෝම් වෙච්චි උන් ඇවිත් කුඩාරම් ගලවන්න ගත්තා. එදා තමයි දේශපාලුවන්ට මරබිය දැනුනේ. සෙල්ලම ලෙල්ලම වෙලා ගියා ප්‍රහාරය අනිත් පැත්ත පෙරලුනා හැමේම කුපිතවෙලා උන්ට ගැහැව්වා ගෙවල් ගිනි තිබ්බා. සීන් එක නැගලාම ගියා.රටම කුපිත උනා නෙව.   බයියෝ බේරේ වැවේ නෑවා.. එකෙක් දෙන්නෙක් දිව්‍ය ලෝකේ ඇරියා..ආතා හැංගුනා.. හෙංචයියෝ මිසිං උනා. ජනාධිපති ලේකම් කාර්්‍යාලය ජනපති මැදුර අරලිය ගහ මැදුර අරගල කාරයෝ  අල්ලා ගත්තා ගොඨා රට පැන්නා.
අරගලය ජයගත්තාද?
 උත්තරය නෑ. 
අරහලය අවසන් කළාද?
 ඒත් නෑ.
අරගලය අවසන් කලේ නෑ. මගින් නතරවුනා. නෑ නතරකළා. 
කවුද නතරකළේ?   ඒ උඹලා අතර හිටිය දේශාපාලුවන්ගේ අතකොලු තමයි එක නතර කළේ. 
එදා ගොල්ෆේස් රගපු හිටපු චරිත දැන් කෝ? 
උන් ඉන්නේ කාගේ ඔඩොක්කුවේද? කාගේ සාක්කුවේද? හොයලා බලපල්ලා. දහදුරා දේශපාලු හොරුන්ගේ කට්ට කයිරාටිකම් උඹලා අපිවාගේ උන්ට තේරෙන්නේ වැඩේ සිද්දවෙලා ඉවරවෙලා. උන් ගේම ගහන්නේ මකිලියාවෙලිගේ නැත්නම් චානක්‍යගේ තියරියෙන් ඒවාට නැටවෙන උන් දන්නේ නෑ කාටද උන් නටන්නේ කියලා.

 ඔය සෙල්ලම් ගැන විමසිලිමත් දෑසින් බලන් හිටපු කොළොම්පුරයා ඔය ගොල්ෆේස් පාස්කරන් වැඩට ගියා මිසක් ඕකේ ලගින්න ගියේ නෑ. අරගලයට ආවේ නෑ..
අරගලේ දැන් ඉවරයි රගපු චරිත දැන් නෑ. අරුන්ගේ පදයට නැටැවුනු කොහෝවත් හිටපු අහිංසක උන් ටිකකට විතරක් නඩු වැටුනා. එදා හිටපු ලොයර්ලා අද උන් වෙනුවෙන් නොමිලයේ පෙනි ඉන්නවාද?         
චන්දෙන් පැරදිලා හොම්බෙන් ගිහින් හිටපු රනිල් ලොක්කා අහක යන පිං චෑන්ස් පාරක් වැදිලා ජනාදිපති පුටුවේ වාඩිගත්තා.. ආපසු  හැංගුනු දේශපාලුවන් කරලියට ආවා. නැට්ට දෙපරන්ද අස්සේ ගහන් කැලේ පැන්න දේශපාලු නරි සෙට් එක සිංහ වෙස් අරන් අපහු ඇවිල්ලා අපිට හූ කියන්න ගත්තා. පිච්චිලා නැතිවුනු දේපල වල වටිනාකමටත් වැඩියෙන් උන් වන්දිත් ගත්තා. තාවකාලික නවාතැන් වලට කියලා තව වියදමුත්  ආන්ඩුවෙන් අයකරගත්තට  ඒවාටත් බදු විදිහට ගෙවන්නේ අපිම නේද? 

අර කප්පම් අරන් අත්හිටවූ සිරදඩුවම් ලැබුනු බඩ තඩි දේශපාලුවා හැමදාම අරගලකාරයින්ට දෙන්නම් බැටේ කිය කිය ඉන්නවා.

 දැන් උඔලාට තේරෙන්නේ නැද්ද උන් අපිව නොමරා මර මර පලිගන්නවා කියලා.  උන් එක දශමයකින් වත් බදු ගෙවන්නේ නෑ. උන් අපේ බදු මුදලින් යැපෙමින්  බදුමුදල් හොරා කමින්  යෙහෙන් වැජබනවා..  රට බංකොලොත් උනත් උන්ගේ හොරා කෑම නම් අඩුවෙලා නෑ

        වැඩක් පටන් ගත්තාම අවසානයක් තියෙන්න ඕනේ  නැත්නම් නොකර හිටපල්ලා.   

පසුව ලියමි
කොළොම්පුරයා කිසිදු දේශපාලන පක්සයකට ගැතිකම් කරන්නෙකු නොවන බවත් මෙය  කිසිදු දේශපාලන  පක්ෂයකට මඩ ගහන්න හෝ ආවඩන්න ලියූවක් නොවේ..
මාගේ පක්ෂය පුරුෂ පක්ෂය පමණි.. 

Saturday, October 14, 2023

මාංසයේ ගුණ (ශනිදා දහයට II )

 


1 අජමාංස " මේෂමාංසං ගුරුසනිග්ධං බල පිත්ත කළුප්‍රදම්"  එළුමස් බරවෙයි, සිනිදු වෙයි,  සිරුර බලවඩයි,වාහණං මාංස වැඩීම කරයි.

2 ජාගමාංස (බැටලුමස්) සැහැල්ලු වෙයි, සිනිදු වෙයි , සීතල නොවෙයි , රුචිබල පුෂ්ටිය දෙයි, වාපිත් නසයි, ශුක්‍ර ධාතු වඩයි, මාංස වැඩීම කරයි, ප්‍රතිශ්යාය නෙවෙයි, ප්‍රමෙහ නසයි, විශේෂයෙන් වාත රෝගයට හිතවෙයි.,"වාහත් ජාගලාදි ඝාතය" බලනු. 

3 මහිස මාංස (මීහරක් මස්) පිණවයි, බලවඩයි , සිනිදු හා උෂ්ණ වෙයි, දිරිමේ බරවෙයි , නිදාජනනය කෙරෙයි, ශුක්‍ර ධාතු වඩයි , පුරුෂ වීර්යය ඇතිකෙරෙයි, මාංශ පේශීන් දැඩි කරයි, තනකිරි වඩයි 

වරාහ මාංස ( වක්‍ර වක්ත්‍ර මාංසාං)- ඌරුමස් වනාහි ශරීරය තරකරයි, වාතය නසයි, බල වඩයි, ධාතු වැඩිම කෙරෙයි, දිරිමේ ඉතා බරයි, අශීසට හිතවෙයි, වනවරාහමාංශ (වල් ඌරුමස් ) බරවෙයි , මෙදස්, බල, විර්ය වැඩීම කරයි, අශිස් නසයි.

4 හරිණ මාංස - මුවමස් සහැල්ලු වෙයි, තර කෙරෙයි , තුන්දෙස් නසයි, රුචි කෙරෙයි , සෙම්පිත් නසයි, මලමු බදියි, ශොථාතිසාර දුරුකෙරෙයි, රත් පිත් උවදුරු දුරු කෙරෙයි, 

5 ගොධාමාංස ( තලගොයි මස්)  පැසීමෙයි මිහිරිවෙයි, කසට හා කුළුරසද වන්නීය, වා පිත් නසන්නීය, ශුක්‍ර ධාතු වඩයි , ස්ථුල කෙරෙයි, ශරීර බල වඩන්නීය.

6 ග්‍රාමය කක්කුට මාංස (ගම් කූකුලු මස්)  සිනිදු වෙයි, සැහැල්ලු වෙයි ,තර කෙරෙයි , මිහිරිවෙයි , ධාතු පෝෂණය කෙරෙයි , වා නසයි, ගිනි වඩයි, උෂ්ණවෙයි , බලවඩයි , ක්ෂය නසයි , ඇසට හිතවෙයි , ශුක්‍ර හා සෙම් වඩයි

7 අරණ්‍ය කුක්කට මාංස( වන සැවුල් මස් හෙවත් වලි කුකුල් මස්) ශෙලෂ්ම රෝග නසයි , රළු වෙයි, කසට වෙයි,ශීතල වෙයි .

8 ශශක මාංස ( හාමස්)  දිරවීමේ හි පහසුයි , ශීතලයි, තුන්දොස් නසයි , ගිනිවඩයි, සවාස කාස නසයි, රළු වෙයි, මිහිරිවෙයි , සදාකලම පථ්‍යයි.

ඩී,එච්. ඇස් . අභයරත්න මහතා විසින් සංස්කරනය කරන ලද ස්ත්‍රි චිකිත්සාවලිය නැමැති පැරැණි පොතෙන්  උපුටා ගන්නා ලදී...


Saturday, October 7, 2023

පච්චයක් කොටුමුද? (ශනිදා දහයට)



පච්ච කොටනවා කිව්වාම සිහියට එන්නේ අත්වල කොටි මුණ පපුවේ "අම්මා බුදුවේවා"  පිටේ "මරුවා සමග වාසේ" කියලා ගහපු මරදානේ චොප්පේ වැනි මදාවි චන්ඩි තමයි. හැබැයි "අම්මා සමග වාසේ" කියලා "මරුවා බුදුවේවා" කියලා වරද්දගෙන ගහපු ඩයලුත් ඒකාලේ හිටියලු. මොකද ගැහුවට පස්සේ මකන්න කියලාද? පච්ච ගහපු උන් මදාවි චන්ඩි කියලා ලේබල් වැදිලා සමාජයෙන් කොන්වෙලා ගියා.  නිකං හිටියත් පොලිසියෙන් දාගෙන යන සීන් එකක් ඇවිල්ලා කාලයක් පච්ච ගැහිල්ලත් ගහපු උනුත් නැතිවෙලා ගිහිල්ලා තිබ්බත් ආපහු ඉහල සමාජයට අලුත් විලාසිතාවක් සේ ඇවිල්ලා පහල ස්තරවලටත් ඉක්මණින් පැතිරිලා ගියා.  දැන් අලුත් පරම්පරාව ටැටූ ගැහිම (Tattoo) කියලා පොෂ් වචනයක් දාගත්තත් ගහන්නේ පච්චම තමයි. දැන් බලමු පච්ච කෙටිමේ ඉතිහාසය ගැන පොඩ්ඩක්.
 

පච්ච කෙටීම අවම වශයෙන් නව ශිලා යුගයේ සිට ලොව පුරා ක්‍රියාවට නංවා  තියේනවා. මේවා මමීකරණය කරන ලද සංරක්ෂිත සම, පුරාණ කලාව සහ පුරාවිද්යාත්මක වාර්තා මගින් සාක්ෂි දරනවා. පුරාණ කලා සහ පුරාවිද්යාත්මක සොයාගැනීම් වලින් පෙනී යන්නේ පච්ච කෙටීමේ මෙවලම් යුරෝපයේ ඉහළ පැලියොලිතික් යුගයේදී සිදු කර ඇති බවයි. කෙසේ වෙතත්, මමීකෘත මිනිස් සම මත පච්ච කොටා ගැනීම සඳහා සෘජු සාක්ෂි විහිදෙන්නේ ක්රි.පූ 4 වැනි සහස්‍රය දක්වා පමණයි. මේ දක්වා පච්ච කෙටූ මිනිස් සම පිළිබඳ පැරණිතම සොයාගැනීම  එය Otzi the iceman ගේ සිරුරෙන් හමුවී ඇති අතර එය ක්‍රිස්තු පූර්ව 3370 සහ 3100 අතර කාලයට අයත් වෙනවා කියනවා. ග්‍රීන්ලන්තය, ඇලස්කාව, සයිබීරියාව,  මොංගෝලියාව, බටහිර චීනය, ඊජිප්තුව, සුඩානය, පිලිපීනය සහ ඇන්ඩීස් යන ප්‍රදේශවල ස්ථාන ඇතුළුව, අවම වශයෙන් පුරාවිද්යාත්මක ස්ථාන 49කින් වෙනත් පච්ච කොටා ඇති මමී සොයා ගෙන තිබෙනවා. මේවාට Amunet, පුරාණ ඊජිප්තුවේ ( 2134-1991 BC), රුසියාවේ Pazyryk සංස්කෘතිය සහ පූර්ව කොලොම්බියානු දකුණු ඇමරිකාව පුරා සංස්කෘතීන් කිහිපයක් ඇතුළුව සයිබීරියාවේ බහුවිධ මමීවරුන් ඇතුළත් වෙනවා.
Pazyryk ටැටූවක්



පැරණි මමීකෘත මානව අවශේෂ මත සංරක්ෂණය කර ඇති පච්ච වලින් හෙළි වන්නේ පච්ච කෙටීම ලොව පුරා සහස්‍ර ගණනාවක් තිස්සේ භාවිතා කර ඇති බවයි. 2015 දී, පැරණිතම පච්ච කොටා ගත් මමි දෙකෙහි වයස විද්යාත්මකව නැවත තක්සේරු කිරීම කළා, එවකට දන්නා පැරණිතම උදාහරණය ලෙස Otzi හඳුනා ගන්නා ලදී. පච්ච 61ක් සහිත මෙම සිරුර ඇල්ප්ස් කඳුකරයේ ග්ලැසියර අයිස් වල තැන්පත් වී තිබී සොයා ගන්නා ලද අතර එය ක්‍රි.පූ. 3250ට අයත් වෙනවා. ලොව පැරණිතම රූපමය පච්ච කොටා ඇත්තේ ඊජිප්තුවේ  ක්‍රි.පූ. 3351 සහ 3017 අතර කාල නිර්ණය කරන ලද මමී දෙකක් මත ය.

පුරාණ පච්ච කෙටීම ඔස්ට්රොනීසියානු ජනතාව අතර බහුලව භාවිතා උනා. එය ඉන්දු පැසිෆික් දූපත් වෙත ඔස්ට්රොනීසියානු ව්්‍යාප්තියට පෙර අවම වශයෙන් ක්‍රි.පූ. 1500 ට පෙර තායිවානයේ සහ වෙරළබඩ දකුණු චීනයේ ප්‍රා ඔස්ට්රොනීසියානුවන් විසින් දියුණු කරන ලද මුල් තාක්ෂණයන්ගෙන් එකක් විය.

මුහුණේ පච්ච කෙටීම ඇතුළුව පච්ච කෙටීමේ සම්ප්‍රදායන්, තායිවාන ආදිවාසීන්, දූපත්වාසී අග්නිදිග ආසියාතිකයන්, මයික්රොනීසියානුවන්, පොලිනීසියානුවන් සහ මැලගසි ජනයා ඇතුළු සියලුම ඔස්ට්රොනීසියානු උප කණ්ඩායම් අතර සොයාගත හැකිවේ. බොහෝ දුරට ඔස්ට්රොනීසියානුවන් පච්ච කෙටීමේ කටුව සම තුළට තල්ලු කිරීම සඳහා ලාක්ෂණික ලම්බකව අඳින ලද පච්ච කෙටීමේ කටු භාවිතා කළහ. මිට සාමාන්යයෙන් ලී වලින් සාදන ලද අතර තනි, සමූහගත හෝ පනාවක් සෑදීමට සකසන ලද කටු පැඟිරි කටු, මාළු ඇට, අස්ථි, දත් සහ කැස්බෑ සහ බෙල්ලන් කටු වලින් සාදන ලදී.

පුරාණ පච්ච කෙටීමේ සම්ප්රදායන් පැපුවන් සහ මෙලනේසියානුවන් අතර ද ලේඛනගත කර ඇති අතර, ඔවුන්ගේ සුවිශේෂී දඉිසාස්බ සම සිදුරු කිරිමට භාවිතා කරයි.
උතුරු ඇමරිකාවේ ආදිවාසීන්ට පච්ච කෙටීමේ දිගු ඉතිහාසයක් ඇත. පච්ච කෙටීම සම මත සරල සලකුණු කිරීමක් නොවීය. එය ස්වදේශික ලෝකය දැනගැනීමේ සහ බැලීමේ ක්‍රමවලට මෙන්ම පවුලට, සමාජයට සහ ස්ථානයට ඇති සම්බන්ධතාවලට සංස්කෘතික සම්බන්ධතා ඉස්මතු කරන ක්‍රියාවලියක්වේ.

උතුරු ඇමරිකාවට ගිය මුල් ගවේෂකයෝ තමන්ට හමුවූ ආදිවාසීන් ගැන බොහෝ වාර්ගික 
නිරීක්ෂණ සිදු කළහ. මුලදී, ඔවුන් පච්ච කෙටීම සඳහා වචනයක් නොතිබූ අතර ඒ වෙනුවට සම වෙනස් කිරීම් විස්තර කළේ ”Pounce, prick, List, Mark, and Rase" to "Samp, Paint,Burn, and embroider” ලෙසයි.

ජපානයේ ආධ්යාත්මික හා විසිතුරු අරමුණු සඳහා පච්ච කිරීම අවම වශයෙන් jomon  හෝ paleolithic  යුගය දක්වා විහිදෙන බව සැලකෙන අතර Yamto සහ ස්වදේශික jomon කණ්ඩායම් සඳහා විවිධ කාල පරිච්ඡේදවලදී එය ව්්‍යාප්ත වුනා. ජපන් ජාතිකයින් පච්ච කෙටීම සහ අනෙකුත් ශරීර සලකුණු මගින් පෙන්නුම් කෙරේ. එකල චීන ග්‍රන්ථවල ද සෑම වයස් කාණ්ඩයකම සිටින ජපන් පිරිමින් ඔවුන්ගේ මුහුණු සහ සිරුර පච්ච කොටා ගන්නා ආකාරය විස්තර කර ඇත.

1603 සහ 1868 අතර, ජපන් පච්ච කෙටීම උකියෝ උප සංස්කෘතිය විසින් පමණක් සිදු කරන ලදී. සාමාන්යයෙන් ගිනි නිවන භටයන්, සේවකයන් සහ ගණිකාවන් තම තත්ත්වය සන්නිවේදනය කිරීම සඳහා පච්ච කොටා ගත්හ.

1868 දී පිහිටුවන ලද Meiji ජපානයේ රජය, පච්ච කෙටීමේ කලාව සම්පූර්ණයෙන්ම තහනම් කළේ, එය ම්ලේච්ඡ ලෙස සලකමින් සහ ගෞරවනීය බවක් නොමැති බවය. මෙය පසුව අපරාධකරුවන්ගේ සහ පිටමං වූවන්ගේ උප සංස්කෘතියක් නිර්මාණය කලා. මෙම මිනිසුන්ට ”විනීත සමාජය” තුළ තැනක් නොතිබූ අතර ඔවුන් ගැන කෝපයට පත් වුනා. ඔවුන්ගේ පැහැදිලිව පෙනෙන පච්ච කොටා ගැනීම නිසා ඔවුන්ට ප්‍රධාන ධාරාවේ සමාජයට සරලව ඒකාබද්ධ වීමට නොහැකි වූ අතර, ඔවුන්ගෙන් බොහෝ දෙනෙකු අපරාධ ක්රියාකාරකම්වලට බල කරමින්, අවසානයේ ජපානයේ පච්ච කොටා ගැනීම බොහෝ දුරට සමාන පදයක් වී ඇති නවීන ජපන් මාෆියාව වන යකුසා සඳහා මූලාරම්භය වෙලා තියෙනවා.

අපේ රටේ නව රැල්ලක් වෙලා තිබුනත් මේක ඉතා පැරණි එකක් බව දැන් තේරෙන්න ඇති නේ. අපේ රටේ ආරක්ෂක සේවයට ඒ කියන්නේ ආමි නේවි ගුවන් වාගේම පොලීසියේ රස්සාවටත් ටැටූ හහපු අයව බදවාගන්නේ නෑ.ඒවාගේම ජපානයේ උණුවතුර ස්නානය කරන Onsen Springs and babathing facilities වලට ඇතුල්වීමට දෙන්නේ නෑ.

  ගැහැවුවෙත් මකන්න කියන තරම් ලේසි නොවන නිසා පනින්න පෙර සිතා බලනු කියමන මොළේට අරන් මාරාන්තික ලෙඩ බෝ නොකරගෙන සෞඛ්‍ය ආරක්ෂිත ලෙසට ගහන පච්චයක් ගසාගන්නා ලෙසත් කොළොම්පුරයා මතක් කරන්නට කැමැත්තෙමි.

Otzi ගේ පච්ච කොටපු තැන්


Wednesday, August 2, 2023

එන්න අපි ජීවත් වෙමු.

 *වසර තුනකට පෙර අපි ජීවත් වූහ....* 

*********************



ඒ කොවිඩ් 19 වසංගතය දරුණුවටම ලෝකය ගිලගත් කාලයයි.


තුන්වේලටම ගෙදර උයන්නේය.


ඒත් පාන්දර ඇහැරීගෙන නොනටන්නේය. කඩෙන් කෑම වානාය. පිටි කෑම අවමය. එයත් ගෙදර හදාගෙනය. 


සෙට් වීම් මිසිංය. සිගරට්  නොබී ටොයිල්ට් ගිය උන්ට හොදට බඩ යන්නේය. කුඩු සික් කාරයෝ අගේට ඉන්නේය. 


පොඩ් එවුන් ඔහේ නිදහසේය. කාටුන් බලන්නේය. ටියුෂන් නැවතිලාය. අම්මලා බනින්නේ නැතිය. ඕප දූප ලොක් ඩවුන්‍ ය.


මල් ගස් ටික අත ගෑවෙන්නේය. ඉඩ ඇති තැනක කෑම පැලයක් හිටවන්නේය. පරණ අල්මාරි අස් කරන්නේය. පිළිකන්න සුද්ද කරන්නේය. වළං මැස්ස හදන්නේය.


වාහනයට නිදහස්‍ ය. පැය විසි හතරම ගෙදරය. වැඩිපුර නාන්නේය. බල්ලාද නාවන්නේය. 


නොදැක ඉන්න බැහැ කිව් හොර ගෑනු මිනිස්සු මීක් සද්දයක් නැතිය. ඩයි එක ඉවර වී ගෙදර එකාගේ එකීගේ සුදු කෙස පේන්නේය.


අතේ සතේ නැතිය. එහෙත් ජීවත් වුනොත් ඇති යැයි දැනෙන්නේය.  ණය ගත්තා කියා අමතකය. දුන්න එවුන්ද නිහඩය. වාරිකේට රිමයින්ඩර් නැතිය.


වෙලාවට කන්නේය. වෙලාවට නිදන්නේය. ඇහැරිලා ටිකක් පෙරලි පෙරලී ඉන්නේය. ප්ලේන්ටියක්ද ගහන්නේය.


පත්තර වල ඕප දූප නැතිය. ටීවී එකේ දේශපාලුවන්ගේ මගුල් විවාද නැතිය.


පාර්ලිමේන්තුවේ  කෝලං නැතිය. නිදි මරං ඒවා බලන්න බැරිය.


ගෙවල් ගානේ සම්මාදමේ එන උං නැතිය. දෙන්නද සතයක් නැතිය.


බයිසිකල් රේස් නැතිය. අවුරුදු කුමාරි මිසිංය.


කෑම ජීවිතය නොවන බව දැන කන්නේය.  මස් මාලු අවමය. දෙවේලක් කෑවත් ගෙදර උන් ඔක්කොම එකට කන්නේය. 


මරණය සිහි කරන්නේය. මොකට දිව්වාද කියා හිතෙන්නේය. 


රාජකාරී ඇමතුම් අවමය. හෙට දවසේ අවිනිශ්චිතතාවය ගැන වෙනදාට වඩා හිතෙන්නේය.


සියලු සත්වයෝ නිදුක් වේවා යැයි සැබවින්ම සිතෙන්නේය. පතන්නේය.


පරිසරයට නිවාඩුවක් ලැබිලාය.

මිනිසාව ගෙවල් තුල හිර කර පරිසරය සැනසුම් සුසුම් හෙලන්නේය. 


සමාජය ලොක් ඩවුන් වී ජිවිතය විවරව තිබේ.

දිනෙක මේ ලොක් එක අරිනු ඇත. ජීවත් වුන දවස් කීපය අමතක කර දමන්න හැකි වේවිද ඔබටත් මටත්? 


එන්න අපි ජීවත් වෙමු.  

පසු වදන...

කොළොම්පුරයාට බ්ලොග් ලියන්නට වදනක් හිතන්නටවත් වේලාව හොයාගන්නට බැරිව ෆුල් බිසියක ඉන්නා අවදියක වට්සැප් හරහා ආපු මෙය දැක අසරණව හා කම්පාවූ සිතින්‍ යුතුව කොපිකර දමමි.... ලියු කෙනා නොදනිමි..  ඔහුට ස්තූතිය පළ කරමි..

Friday, January 27, 2023

සිරිබිරිස්ගේ ලංකාවතරණය හා Teepee Camp ගොඩබැස්ම සබැදි කතා


ඔන්න බොහොම කාලයක් වල් වැදී තිබුනු කොළොම්පුරේ බ්ලොග්  අඩවියේ  සුද්දබුද්ද කර යළි පනගන්වන්නට සිරිබිරිස්තුමාගේ ආගමනයත් හේතුබුතවුනා කියන්නට පුලුවනි.  සුමාන දෙකකට පෙරාතුව ඉරුදිනයක අපේ නිදි ලොක්කා කොළොම්පුරයා ඇමතුවා. එදා ඉගෙන නොගත්තු කොළොම්පුරයා දැන් ඉරිදාට පන්ති යන්න අරන් නොවැ. රස්සාවේ හා ගෙදර කප්පරක් වැඩ අස්සේ ඉගෙන ගැනිල්ලත් ලෝක අමාරුවැඩක් කියලා මේ වැඩකරපු උන්නැහැලා  දන්නවා ඇති නේ. දැන් දන්නවා නේ කොළොම්පුරේ අඩවිය වල්වැදුන හේතුව.  ඉතිං නිදි ලොක්කාගේ ආරාධනාව බොහෝම එක සිතින් එක පයින් බාරගත්තු මංතුමා 21 වන සෙනසුරාදා වරුවක නිවාඩුවක් දමා තට්ට මහතැන්ගේ හක්බෙල්ලාවක ටිපි කෑම්ප් යන්න ඇගිලි ගනින්න පටන්ගන්නයි හැදුවේ. දැන් දින ගනින වැඩේ නොකරන්නේ කන්ඩාගේ ලංකාගමනයේ බ්ලොග් සැදෑවට දින ගැනපු කොළොම්පුරයා අන්තිමේ අහක යන  පිහිපාරක් බාරගෙන කළුබොවිල ඉස්පිරිතාලේ ඇදක දපන්න උන හින්දා. සුමානයක් විතර ගෙවිලා ගිය අල්ලපනල්ලේ මේන්න ආපහු අපේ නිදි ලොක්කාගෙන් ඇුමතුමත් එනවා.


"අසංග අපේ ඩ්‍රැකි උන්නැහැට ඉලෙක්ෂොන් නාමයෝජනා ගන්න වැඩේ අන්තිම දිනේ වැටිලා තියෙන්නේ 21 හින්දා එන්නට බැරිලු. ඉරිදාට අපේ හමුව තියන්න පුලුවන්ද අහනවා."
 "මට පන්ති තියෙනවා නේ නිමල් අයියේ. හරි බලමු මොකක් හරි  කරගන්න පුලුවන්ද කියලා."
අන්තිමේදි  කොළොම්පුරයා තිරණය කලා ඩ්‍රැකියා හින්දා එදින තියෙන පංතිය කට්කරන්න. ඩ්‍රැකියාට තර්ජණාත්මක  දුරකතන ඇමතුමක්  දුන්නා.
" 22 ඉරිදා පංති කට්කරන්නේ බොට එන්න පුලුවන් වෙන්න හැබැයි පුතෝ උඹ නොආවොත් නුවරඑළියට ඇවිත් නිකං ලැබුනු පිහිපාර උඹට දීලා යනවා."
 බලන්න කොළොම්පුරයා වාගේ මැටිමොල් මොට්ටපාල තමන්ගේ පංතිය කට් කරන් සැට්වෙන ගමන් යන හැටි.
අන්තිමේ දි ගමන යෙදුන දිනයත් උදාවුනා. බොරලැස්ගමුව හංදියෙන් නමි කොලුවා ගන්න හිටියත් මිනිහා පොඩ්ඩක් වෙලාසනින් පමුනුව පාර ලගට ගිහිල්ලා. කොළොම්පුරයා පමුණුව පාරගාවට යද්දි නමි කොලුවා පමුනුවෙන් රෙදි ගන්න ආපු ලලනාවන් දිහා ඇහිපිය නොහෙලා අනිමිසලෝචනය කරනවා දැක්කා නොවැ. නැත්තම් මොන කොහෙල්මලකද මේකා නිකං යන්න තියෙද්දි බස් එකෙන් ගිහින් එතැන උන්නේ?
නමි කොලුවා එක්ක නිදි ලොක්කා කියපු වෙලාවට කලියෙන් එහෙට ගොඩවුනාට නිදි ලොක්කා හිටියේ බාත්රුම් එකේ සුපුරුදු නෑමේ යෙදිමින්. ටික වේලාවකින් ප්‍රාජේ උන්නැහේත් ඊට පස්සේ සිරිබිරිස්තුමාත් නිදිගේ නිවසට ගොඩඋනා. උදේ 6.45ට විතර සිරිබිරිස්තුමාගේ රථයෙන් මංතුමාත් නිදි ලොක්කා නමි කොලුවත් එක්ක ප්‍රාජේ උන්නැහැගේ රථයටත් ගොඩවෙලා පිටත්වුනා. යන අතරමගදි අපි වාගේ පුගලුන්ට සීතාවක බැරැණ්ඩි කෝවිල දැක බලාගන්නත් නිදිලොක්කා ඉඩකඩ සලසා දුන්නා. එහෙදි සීතාවක රාජධානිය ගැනත් විද්වත් කතිකාවතක් එහෙමත් එහිදි සිද්ධවුනා කිව්වොත් හරි. 
බැරැන්ඩි කෝවිලේදි


   උදේ 8.30 විතර වෙද්දි අපි සියල්ලෝම හක්බෙල්ලාවකට සේන්දුවෙනකොට තට්ට මහතැන් අපි එනකම් පාරදිහා දෑස් දල්වාගෙන බලාගෙන ඉන්නවා. ඉතිං ඕං අපි ආවා කියලා Kayak Pavilion  එකට ගොඩවුනාම දැක්කේ අපේ හිතාදර රවි ලොක්කාත් වෙලාසනින්ම එහෙට ගොඩබැහැලා විත්තිය. එකිනෙකාට ආචාර සමාචාර කරගෙන ඊළගට සුදානම් වුනේ තට්ට මහතැන් ගේ ජීප් රථයට සියලු බෑග්මලු ලටපට පටවාගෙන ටිපි කෑමප් වෙත ගමනේ යන්න. එත් ලොකු පරහකට උන්නේ නුවරඑළියේ ඉදන් එන නිපකෝ අලකොමසාරිස් ධුරන්දර ඩ්‍රැකියාගේ ප්‍රමාදයයි. එයා එනකම් කස්ටියව කැමරන් දියෙස්ගේ බාප්පාගේ දියෙස් හෝටලෙන් ලිපෙන් බාපු ගමන් හොට් හොට් උනු උනු ලැවරියා ස්ටිමරයක් ගෙනවිල්ලා ජිප් එක මතින් තැබිමයි. කට පිච්චිගෙන  ලැවරියා ගිල්ල අපිට ඊළගට ලැබුනේ කිතුල් හකුරු එක්ක ප්ලෙන්ටි. පහුවෙලා හැටන් බස් එකෙන් ආපු ඩ්‍රැකියාට ලැබුනේ හුලං තමයි.


කඩෙන් ගන්න තියෙන සියලු දෑ අරගන්න ඉඩහැරපු තට්ට මහතැන්
පරක්කුවෙලා ඇවිත් පනාව දාන අපුරුව...

ඔහුගේ ජීප් රියෙන් මහා ඇඩිවෙන්චර් ගමන යන්න ඇරඹුවා. ජීප් රියේ යකඩ පයිප්ප වලින් සෑදු බංකුවක හිදගෙන ගල්ගොඩවල් වලින් උඩින් ගමන් කිරිම තමයි සුපිරි යෑම. අන්තිමේදි පස්ස රොටියක් කරන් අපි තට්ට මහතාගේ ටිපි කෑම්පින් සයිට් එකට ආවා.
ටිපි කෑම්පින් සයිට් එක නම් සුපිරි පොට් එකක් තමයි. පැත්තකින් ගලායන සීතල දොළ පාරනම් අපුරුයි. මුලින්ම කලේ අපි ගෙනාපු බඩුමුට්ටු සියල්ල බාගෙන උදේට කන්න සැරසීමයි. කැමරන් දියෙස්ගේ ලැවරියා කඩෙන් ලැවරියා කාපු හින්දා ටිකක් විතර බඩගින්න අඩුවෙලා හිටියත් කට්ටිය හිටියේ තරමක හාමතින්.ඉක්මනින්ම ඉදියාප්ප ටික බඩට බස්ස ගන්නේ නැතිව කස්ටිය අල කිරි හොද්දේ අල ගැනත් කිරි හොද්දට උළුහාල් දැමිල්ල ගැනත් කන අතරේ සංවාදයකුත් ඇදගත්තා නොවැ.
පිඟන් සේදිල්ල



ඔන්න උදේ කෑමෙන් පස්සේ ඇරඹුනු ඊළග පියවර පටාන්ගත්තා. නෑ .... නෑ..... රහමෙර පානය නොවෙයි. හිතුවා නේද අපි බොන්න ගත්තා කියලා? අපි අපේ බ්ලොග් ගැන පොඩි සාකච්චාවක් ආරම්බ කළා කිව්වොත් නිවැරදියි. අතරමග නැවති තියෙන හා යළට මහට ලියවෙන බ්ලොග් වලට ආපහු ලියන්න කියා ඉල්ලීමකුත් කරන්නටත් ඒවාගේම අනෙක් බ්ලොග් වලට කොමෙන්ටුවකින් හෝ ප්‍රතිචාරයක් යවන්නටත් බ්ලොගාලා කට්ටිය කතාකරගත්තා. කොළොම්පුරයා නම්  බොග දමන්නෝ කියන නමට නම් එච්චර කැමැත්තක් නෑ. එකේ මහ ගද සීන් එකක් කොළොම්පුරයාට දැනෙනවා නෙව. එහෙම ගද ගහන චරිත මේ බ්ලොග් ලොවේ නැති හින්දා බොග දමන්නෝ කියලා ආමන්ත්‍රනය කරන්න එපා කියලා ඉල්ලන්නත් කැමතියි.  
  මේ අස්සේ නමි කොලුවා වැසිකිලියේ බටයක් කඩාගෙන හෙන ජරමරයක් කරගෙන ආපි. අන්තිමේදි වතුර සැපයුම නවතා දමන්නට සිද්දවුනේ ඒක රෙපයාර් කරන්නට බඩු එහේ නොතිබ්බ නිසයි.
ඊළග ජවනිකාව තමයි සංගිත දහවල හා මධුවිත සංග්‍රහය. රවි ලොක්කාගේ පොල්බටේ පාත් කිරිල්ලයි සුද්දගේ සයිස් එකයි තට්ට මහතැන් පත්තර ලොවේ දැවැන්ත චින්තන ජයසේන මහතා එක්ක ගුවන්විදුලියට ගිය හැටි අපූරු රසකතන්දරත් මිවිත එක්ක මුසුවෙලා ගියා.




ඒ අස්සේ කොළොම්පුරයා වැසිකිලි යන්න ගිහින් නමියා කඩපු බටෙන් හොද හැටි නාගෙන තමයි වැසිකිලියෙන් ආපහු එලියට එන්න පුලුවන් වුනේ.  



ටිකෙන් ටික වේලාව ගතවෙනවා බොගාලට දැනුනේ වත් නැති තරම්. දිවා ආහාරය ගැනිල්ල පසෙකට කල්දාලා සාදය තවදුරටත් ගෙනියන්නට තමයි සියල්ලන්ගේ අනුමැතිය ලැබුනේ.  රසවත් සංගිත සාජ්ජයෙන් පස්සේ කට්ටිය සීතල දොලේ බැහැලා රත්වුනු සරිරකූඩු ටිකත් නිවාගත්තා. අත්දෙක වනවනා ආපු ඩ්‍රැකියා රවි අයියාගේ කලිසම නයට ඉල්ලාගෙන තමයි වතුරට බැස්සේ. අපුරු සීතල වතුරෙන් එලියට එන්නත් කොළොම්පුරයාට හිත දුන්නේම නෑ කිව්වොත් හරි.
ඉතිං ටිපි කෑම්පින් සයිට් එකට සමුදෙන්න කාලයත් ආවට පස්සේ කට්ටිය බඩුමුට්ටු සියල්ල පටවාගෙන ආපහු අර ඇඩ්වෙන්චර් ජිප් රයිඩ් එකෙන් ආපහු කායක් පැවිලියන් එකට ආවා. එැතැනදී දිවා ආහාරය තට්ට මහතැන් සැපයුවා.  කෑමත් අපුරුවට සකසා තිබුනා. ඩ්‍රැකියානිගේ උදහසට ලක්වේවි කියා බියවුනු ප්‍රමාදවී ආපු ඩ්‍රැකියා ඉක්මණින්ම සමුගත්තා. අවසානයේදී සුපිරි දිනයක් ගතකරපු අපි සියල්ලෝ රවි ලොක්කා හා තට්ට මහතැන් හක්බෙල්ලාවක තනිකර දමා ආපහු මහරගමට පිටත්වුනා. බොරලැස්ගමුවෙන් නමි කොලුවා අතහැරපු කොළොම්පුරයා ගල්කිස්සට පිටත්වුනේ අපුරු දිනක් ගතකරන්නට ඉඩ සැලසු අයට හිතින් ස්තූති කර කර තමයි.

Monday, October 17, 2022

ලේගිරිස්

   


අල කොමසාරිස් ධුරන්දර ඩ්‍රැස්කියා මහත්තයා අල කොමසාරිස් තනතුරත් බාරගෙන සීතල  නුවරඑළීයේ පදිංචියට ගිය විත්තිය බ්ලොග් ලොවේ හැමෝම දන්නා කියන කාරනාවක් නේ. ඉතිං මේකා ඔය සීතල පැත්තේ ඉන්නකොට කාන්සිය පාලුව සීතල යන්නත් එක්ක මධ්‍යපාන ටිකක් අරන් අල බංගලාව සුද්ධ පවිත්‍ර කරන්න ආපු ලෙච්චිමී කෙනෙකුත් එක්ක අඩව්වක් එහෙම අල්ලන්න පුලුවන් කියලා අල කොමසාරිස් නෝනා නගාගේ හැදිමිටේ දිග මොළ පොඩියේ තඩි සිතුවිල්ලක් පහළවුනා. ඒ බරපතල සිතුවිල්ල නිසා මේ අලකොමාට තනිකඩ සීන් එකෙන් නුවරඑළියේ අල බස්සන්න හිතන් හිටපු එකටත් කෙළවුනා නේ බං. අන්තිමේදි නෝනා නගාගේ ආඥාවට යටත්ව එහෙට යනකොට නෝනයි පොඩි අලයයි විතරක් නොවේයි තමන්ගේ මහගෙදර උන්නු ලේගිරිසාවත් අඬගහන් අලුත් පලාතේ පදිංචියට ගියා. දැන් මේක කියවන ඔහෙලාත් බලයි කවුද මේ ලේගිරිස්? මොකටද ලේගිරිසාව අරන් යන්නේ කියලා. මේ ලේගිරිසා කියන්නේ අලකොමාගේ මහගෙදර ආවතේව කරන් හිටපු අලයා එක්ක පොඩිකාලේ ඉදන් හැදුන කොල්ලෙක්. මේ ලේගිරිසා අලයාගේ මුත්තාගෙන් ගෙදර වැඩට හිටපු හින්නිහාමිට සුලු අත්වැරදීමකින් සිදුවු අවකල් ක්‍රියාවක් හින්දා උත්පාදවුන එකියක් වුනු මැගිලියාට සෙල්ලං බාප්පාගේ සෙල්ලමකින් සිද්දවුනු පොඩි වැරද්දකින් මෙලොවට ආපු කොල්ලෙක්ලු. හොද නැඩයා උනත් ලේගිරිසාට පොඩි නුහුගුනයක් තිබ්බා. පොඩ්ඩක් මොඩ පහේ ගතියත් ඉක්මනින් පනින මල අතට ගැනිල්ලත් උගේ ගතිය උනා. දන්නවානේ ලේ ඥාතිගෙන් ලැබෙන දරුවන්ට ඇතිවන ලෙඩ. 


අල බැහැලාද එහෙම බලන්න විසිට් දාන දවස්වලට අල කොමා ගේ ටිකිරිස් වැඩවල ඔත්තු බලන්න එහෙම විස්වාසවන්ත ලේගිරිසාවත් එක්කගෙන ගියා. ලේගිරිසා අල කොමා එක්ක රාජකාරි ගියාම අලකොම් නගාගේ තනියත් වැඩිවුනා. කොහොම නමුත් අල කොමා ලේගිරිසාව ගෙදර නගා එක්ක තනියෙන් තිබ්බේ නෑ. මිනිහා දන්නවා නෙව ලේගිරිසාට තියෙන්නේත් වල් මුත්තාගෙත් සෙල්ලං බාප්පාගෙත් ලේ කියලා.  ලේගිරිසාට වඩා ගෑනු කෙනෙක් ගෙදර ඉන්න එක හොදයි කියලා අලකොමා හිතුවේ ඔය අතරේදි තමයි. අන්තිමේදි අලකොමා ගෙදර වැඩටත් නගා ගේ ඉවුම් පිහුම් වලට අත්උදව් දෙන්නත් පොඩි අලයාගේ තනියට සෙල්ලම් කරන්නත්  ආගරපතන පැත්තෙන් කමලානි එක්කගෙන ආව.

 

එනකොට ගිංතොට තුනිලෑලී කම්මලේ පිට පලු කෑල්ලක් වාගේ ආපු කමලානි කෙල්ලත් අලකොමසාරිස් බංගලාවේ සැප කෑම ටික අල්ලලා ගිහිල්ලා හොදට ආරලා මොරලා ආවා. අලකොමා ගේ සැපත් අල්ලලා ගියාද මන්දා.  කමලානිගේ තෙල් බේරෙන හැඩ කඳ දැක්කාම අලකොමා තොලකට ලෙවකාලා කෙළ පෙරෙන්න ගන්නවා. ඒක නෝනා නගා ටත් පොඩ්ඩක් විතර නොන්ඩි වෙලාත් තිබුනා.  ඔහේලා දන්නවානේ අපේ අලකොමා කොහෙමත් කොබා නේ.  

ඔහොම ටික කාලෙකට පස්සේ අල කොමාට කමලානිගෙන් නිදහස් වෙන්න හිතුනා. මිනිහා මුට්ටිය නොකඩා බෙල්ලත් නොකපා වැඩේ කරගන්නේ කොහොමද කියලා හිතුවා. දන්නවනේ මිනිහා කට්ටයා නෙව. අලකොමාම ලේගිරිසාගේ ඔලුවට කමලානි ගැන අනම් මනම් දාලා ලේගිරිසාටත් කමලානි ගැන පොඩි මෙව්වා එකක්  හැදුනා. දවසක් රෑ පානේ ඇදේ දපලා ඉන්නැද්දි කමලානිට ලේගිරිසාව ජෝඩුකරන යෝජනාව නෝනා නගා ට අලකොමා කිව්වා.

"ලේගිරිසාට දැන්ම කසාදයක් කරලා දෙන්න ඔනේ. දවසක් දෙකක් මිනිහා මම නයිටියක් ඇදන් හිටපු දිහා මහ වනචර බැල්මක් දැම්මා."
"ඒක තමයි මම ලේගිරිසාට ඉක්මනින්ම බන්දලා දෙන්න හදන්නේ. ලේගිරිසාව සුවර් නෑනේ."  
"අපොයි මම දන්නේ නැද්ද ඔයාගේ හැටියෙන්ම කියතෑකි නේ පරම්පරාවේ අයගේ හැටි. ඔයත් කමලානි දිහා බලනවා වැඩියි කියලත් මට හිතෙනවා.
මිනිහානම් කමලානිට කැමති පාටයි. එත් කමලානි ඔය මෝඩයාට කැමති වෙයිද?"
අලයා කතන්දරේ වෙන පැත්තකට හැරෙව්වා.
"කොහොම හරි කැමති කරවාගමු.
අපේ ගනේමුල්ලේ මුත්තාගේ ඕවිටි කෑල්ලෙන් පර්චස් 20 ක් මුගේ අම්මාට ලියලා දෙනවා කියලා තමයි ඒ දවස් වල හිටියේ. මැගිලින් මැරුණ හින්දා ඒක දෙන්න බැරිවුන එකේ ලේගිරිසාට ඒක ලියලා දෙනවා කියමු. උන්ටත් කලක් යන්න එපැයි නේ."
"ඔයාට පිස්සුද අනේ 20ක් දෙන්නේ දහයක් දෙනවා කියමු."
කොහොමින් කොහොම නෝනාත් අලකොමාත් කමලානිට ලේගිරිසා ගැන කිව්වා. මුලදි අකමැතිවුන කමලානියත් පස්සේ කල්පනා කරලා බැලුවා. යන එන මං නැතිවුන ආගරපතනේ කමලානිටත් කොළඹට කිට්ටුවෙන් ගෙයක් දොරක් හදාගන්නට ඉඩං කෑල්ලක් ලැබෙනවා කියන්නෙත් ලොකු දෙයක් නේ. අන්තිමේදි ඒකි ලේගිරිසාට කැමැත්ත දුන්නා. වැඩට හිටිය එකා වුනත් පොඩි කාලේ ඉදන් එකට හැදුන එකා වෙච්චි ලේගිරිසාට කසාදයත් හොදට කරලා දෙන්න අලකොමාත් හිතුවා. 

ලේගිරිසා මුලින් කැමතිවෙලා උන්නත් පස්සේ මගුලක් ගන්නවාට කැමතිවුනේ නෑ. කමලානිත් බැලුවා මේ මොකද මේ මිනිහාට උනේ කියලා. බැලින්නම් මලපොතේ අකුරක් නොදන්න ලේගිරිසා කසාද සහතිකේට අත්සන් කරන්න බැරි හින්දයි මේ පස්ස ගහන්නේ. අකුරු සෑස්තරේ ටිකක් දන්නා කමලානිත් ගේම අතහැරියේ නෑ. ලේගිරිසාට ලේගිරිස් කියලා අත්සන ලියන්න ඉගැන්නුවා. ගොන් අලියාවාගේ උන්නාට අපේ ලේගිරිසා දවස් ගානක් අමාරුවෙන් අමාරුවෙන් නම ලියාගන්න පුලුවන්වුනා.

මගුලට අරාධනා කරන්න නෑ සනුහරයක් නැති ලේගිරිසාගේ පොඩියට ගන්නා උත්සවයට අපේ බ්ලොග් කාරයෝ කිහිප දෙනෙක්ටත් අල කොමි මහතැන් උත්සවයට ආරාධනා කළා. අශ්ඨක කියන්න අපේ නිදි ලොක්කාට කිව්වාම එයා එයාගේ මිත්‍ර පන්සල් සීයා දේවාල මාමාට වැඩෙි පැවරුවා. පස්සේ මගුල් පොරුගහලා කරන මගුලක් ගන්නේ නැතිව රෙජිස්ටර් වැඩේ විතරක් කරන්න කියලා නෝනා නගා ගේ බලවත් ඉල්ලීම උඩ පොරු නැග්ගීම කැන්සල් කෙරුවා. ලේගිරිසාගේ පැත්තෙන් සාක්කියට අත්සන් තියන්න වැටමාර අධිපති ප්‍රාජේ මහත්තයාටත් කමලානිගේ පැත්තෙන් අත්සන් කරන්න දෙමළ නයන්නා ප්‍රසන්නයාත් කැමතිවුනා.
සුන්දර නුවරඑළියේ වැසිබර කාළගුණයක් තිබුන දවසක ඔන්න මගුල් උත්සවය ඇරඹුනා. නමියාගේ විදියේ නමියා හිටු කියලා පරණ තඩි කැමරා කටුවකින් පොටෝ කෑලි අල්ලනවා. පස්සේ තමයි අපි දන්නේ මේකා උස්සන් ඇවිත් තියෙන්නේ අර ආදිකාලේ රීල් දමන පොටෝ යන්තරයක් නෙව. හොදම වැඩේ කියන්නේ කොච්චර පොටෝ කෑලි ඇල්ලුවත් මේකා ඒකට රීල් එකක්වත් දාලා නොවෙයි ඉදලා තියෙන්නේ. සීතල යන්න එක්ක පොඩියට පොඩ්ඩක් වැඩියෙන් හීනියට එකක් අරගත්තු නිදි ලොක්කාගේ අතිජාත මිත්‍ර නෙවිල් ගොයියා ආහාර කෙසේවෙතත් පාන ගැන සොයා බලනවා. පරණ සැටියක් තියලා එකේ පිටිපස්සෙන් අල වැල් ටිකක් එල්ලලා බැලුන් බෝල ටිකක් පුම්බලා ගහලා සෙටිබැක් එකක් හදලා දුන්නේ කොළොම්පුරයා තමයි. කාලෙකට පස්සේ ලංකාවට සැපත්වුනු කොළඹ ගමයා මහත්තයාත් ඇවිල්ලා හිටියා. කොළඹ ගමයා ලංකාවට එනවා කියලා වෙලාසනින් දන්නවා නම් දෙමළ නයන්නව කපලා සාක්කියට අත්සන් කරන්න දමන්න තිබුනානේ කියලා හිතුන අලයා විස්සෝප වෙන්න ගත්තා.

අලකොමසාරිස් මහතැන්ගේ පරණ කෝට් බෑයක් අමාරුවෙන් ඇගට රිංගවාගත්තු මනමාල ලේගිරිසා හිටියේ මරන්න ගෙනියන හරකෙක් ගානට බයවෙලා. නෝනා නගා එයාගේ පරණ සාරියක් කමලානිට අන්දවලා මේකප් පාරක් දාලා දුන්නා. හැබැයි මනමාලිට අඩුවෙන් මේකප් කරලා වැඩියෙන් ලස්සනවුනේ නෝනා නගා තමයි.

විවාහ ලේකම් මහත්තයාත් වේලාව අල්ලලා ආවා.එයා ඉක්මණට රෙජිස්ටරේ කරන්න සුදානම් කරපු රවුම් මේස පොඩ්ඩේ අර මහදැන මුත්තාගේ පොත වාගේ විසාල පොත දිග ඇරගත්තා. මනමාලි කමලානිත් මනමාල ලේගිරිසාත් පුටුදෙකේ ඉන්දුවා. දෙපැතේතෙන් සාක්කියට අත්සන් ගහන වැටමාර ලොක්කාත් දෙමල නයාත් හිටගත්තා. ලේගිරිසා අමාරුවෙන් ලැජ්ජාවට වාගේ ඇඹරුනා. ඔන්න  දෙන්නාව හිටවලා පොරොන්දුවත් විවාහ සහතිකේට අත්සන් ගහන වැඩෙත් ආවා. බොහෝම කලබල වෙලා උන්නු ලේගිරිසා ලෙගිරිස් කියලා අත්සන ගහන තැන ලිව්වා.
"අනේ ඉක්මනට ලේ යන්න කරන්න ලේ යන්න කරන්න."
ඒක දැකපු කමලානි කලබලවෙලා හිමිහිට ලේගිරිසාට කිව්වා.
"මොකෑ.. ලේ යන්න කරන්න?
හරි බං එව්වා කරන්නේ රෑටනේ මෙච්චර දවසක් නැති හදිසියක් දැන් මොකද? පොඩ්ඩක් ඉවසලා හිටාං රෑවෙනකම්."
ලේගිරිසා කිව එක රෙජිස්ට්‍රාර් ලොක්කාටත් වැටාධිපතිටත් ඇහුනා.  මේකට කමලානි ගොඩාක් ලැජ්ජා උනා. රෙජිස්ටර් වැඩෙන් පස්සේ කමලානි අප්සෙට් එකෙන් ඉන්නවා දැකපු අලකොමා  නෝනා නගාට හොරෙන් ඒකි ලඟට ලංවුනා.
"ඇයි බං මෙච්චර හොඳ දවසේ අප්සෙට් එකෙන් ඉන්නේ? උබට දුකද මාව දාලායන්න?"
"නෑ මහත්තයා මම අත්සන් කරද්දී ලේගිරිස්ට ලේ යන්න කරන්න කිව්වා."
"ඈ ලේ යන්න? ඇයි බං උඹ දැක්කේ නැද්ද නෝනා හිටපු නැති රෑනේ මම උඹට ලේ යන්න කලේ."
"ආ එදාද? ඒ ලේ ගියේ මහත්තයාගේ කරගැටයක් කැඩුනු හින්දා නේ."

අල කොමා කමලානිගේ කතාවෙන් කුණුවෙච්චි අලයක්වාගේ ඇඹරිලා ගියා නෙව.  


Wednesday, August 24, 2022

ස්ටේෂන් පෙන්නීම


   

ඔන්න කොළොම්පුරයාගේ හිතාදර ගුරුජී අන්දුබයියාගේ විර වික්‍රම ඇඟපත සුලලිත වෙලා කිලිපොලා යන අති සුන්දර කතන්දරයක් අරන් ආවා.
ඔන්න එක්තරා සෙනසුරාදා දිනයක කොළොම්පුරයාගේ ඔපිසියට අසුබදායි සුබ ආරංචියක් ආවා. ඒ කොළොම්පුරයා රාජකාරිකොරන ආයතනයේ හා අංශයේ  GM ලොක්කෙකුගේ පියානන් කළුරිය කළ විත්තිය. දන්නවානේ කට්ටියට මළගෙදරකට යෑම කියන්නේ ට්‍රිපක් ගියාසේ තමයි. අනික කාගේ මළගෙදරකට නොගියත් මේ මළගෙදරට සහභාගිවෙන්නම ඕනේ. මොකද කොළොම්පුරයාත් එම GM යටතේ ඇති අංශයේ වැඩ රාජකාරිකරන උදවිය හින්දා. කොළොම්පුරයාගේ ඔපිසියේ දෙවැනි බොසාගේ පදිංචිය නුවර. එයාට නුවර ඉදන් දිනපතා කොළොම්පුරයට එන්න යන්න බැරි නිසා බෝඩිමක තමයි නතරවෙලා උන්නේ. මේ කියන කාලේ අපේ දෙවැනි බොසාට තිබුනා ටවුන්එස් වෑන් රථයක්. ඒකෙන් සති අන්තයට නුවර ගොහින් ආපහු සදුදා උදේම කුකුලත් අතින් අරන් සෙකංඩගලින් සල්පිටි කෝරලේ ගෙන්දගම්පොළාවට නැත්නම් කොළොම්පුරයට මංගච්චනවා. එයාත් ලෑස්තිවුනේ සෙනසුරාදා දිනයක්වුන හින්දා මළගෙදරට සහභාගිවෙලා ඒගමන්ම ගෙදර යන්න පුලුවන් නිසයි. අපිත් එයාගේ වෑන් රථයෙන්ම කුරුණෑගල යන්නයි දැන් ලෑස්තිය. ලොකු බොසා තියෙන වැඩ ටිකත් ඉවරකරගෙන හවස්වෙලා එන විත්තියක් කිව්වා. එයත් එක්ක එන්න එයාට මුට්ටි අල්ලන කිහිප දෙනෙක් නතරවුනා. අපි කට්ටිය දවල්ට කාලා එහෙම වෑන් රථයට ගොඩවැදුනා. 
       කොහොමත් බීමට ලැදි අන්දුබයියා පෑලියගොඩට එන්නත් පෙරම කොළොම්පුරයා ඇතුලු කිහිප දෙනාට කොදුරන්න ගත්තා. ඒ ඉතිං මළගෙදරට යන්න ඉස්සර මේ සොකජනක අවස්තාව සමරන්න. මේ වැඩේ නොකෙරුවෙත් අන්දුබයියාගෙන් බේරිලා ආපහු ඔපිස් එකේ වැඩකරලා හමාරයි. අපිත් අනුමැතිය දීලා අහවරවෙලා බොසාට කියලා දැල් කඩයක් අසළ නවත්වාගත්තගෙන දැල් කඩේ ලඟට ගිහින් සම්මාදම්ක් දැම්මා. එත් ඉතිං අන්දුබයියා සාක්කුවට අත දැම්මාට අත එළියට එන්නෙත් නෑ සල්ලි එන්නෙත් නෑ. අපේ අන්දුබයියා කවදාවකත් මුදල් පසුම්බියක් නැතිනම් පර්ස් එකක් පාවිච්චි කරන්නේ නෑ. අත දැම්මාම එළියට ආපහු නොඑන හින්දා අන්දුබයියාට තියෙන්නේ රබර් සාක්කුයි කියලයි සමහරුන් එහෙම කියන්නේ. කොළොම්පුරයා නම් එහෙම කියලා නෑ ඔහේලා පල්ලා සත්තයි. අන්දු බයියාගේ සාක්කුවට ගිය අත එහෙමම තියෙද්දී වැඩිපුර සල්ලිය බාගේ තියෙන උන්ගේ අනුග්‍රහයෙන් බියර් කෑන් කිහියක් වෑන් රථයට වැඩැම්මෙව්වා. ගෙනාපු හැටියේම කෑන් එකක් කඩාගෙන චියර්ස් නොකියාම ඇදලා ඇරිය අන්දු බයියා ඉදලා තියෙන්නේ මාර තිබහකින් කියලා දුකකුත් ඇතිවුනා. GM ලොක්කා හින්දා වැඩිය ගසලා මළගෙදරට යන්නත් බෑ. අන්තිමේදි යන්නතම් සන්තම් ප්‍රමාණයකින් අපිට සැනසෙන්නට උනත් අන්දුබයියා අපේ ඒවාටත් වග කිව්වා නෙව. කුරුණෑගල නගරය පහුකරන් අනුරාධපුර පාරේ මාස්පොතට ගිහින්  මළ ගෙදරටත් සෙන්දුවුනා. අපේ කට්ටිය කදුක්මුසු මුහුණක් දාගෙන මළගෙදරටත් ගොඩවෙලා GM ලොක්කාටත් ආචාරකෙරුවා. ගෙදරින් එළියට ඇවිත් ප්ලාස්ටික් පුටු ටිකක වාඩිවුන සෙට් එක උන්නේ කතා කරන්න මාතෘකාවක් නැතිවයි. GM ලොක්කාත් අපේ උදවිය ලඟට ඇවිත් කතාවකට මුලපිරුවා. ලොක්කාට වැඩිය මුහුණ දෙන්න බැරි හින්දා අන්දුබයියා කොළොම්පුරයාවත් අඩගහගෙන ගේට්ටුව පැත්තට ගියා.
"ඇයි අන්දුබයියේ මෙහෙට ආවේ? අතන උන්නා නම් මාරි එකක් කාලා නෙස්කැෆේ එකක් බෙන්න තිබ්බා නේ."
"බම්බු නෙස්කැෆේ යකෝ අතන හිටියා නම් GM ගේ කතාවට සෙට් වෙන්න වෙනවානේ."
"ඉතිං මොකෝ?"
"මොකෝ තමයි ඇයි උකන්නෝ අපි බීලා කියලා ඌට දැනෙනවානේ."
අන්දුබයියා බීලා හිටියත් මාර මිටරයකින් නෙව ඉදලා තියෙන්නේ.  

        පාරට ආපු අපි ට කරන්න දෙයකුත් නෑ දෙන්නා එක්ක එහා වත්තේ පොල් ගස්වල පොල්වලූ ගනිනවා ඇරෙන්න. ඒ අස්සේ අපේ පියන් කොලුවාත් දෙවැනි බොසාගේ වෑන් එකෙන් බාගත්තු ශොකාප්‍රකාශ බැනර් මිටියක් උස්සාගෙන එතනට කඩාවැටුනේ නැතැ.

"අන්දුබයියා මහත්තයා මේ බැනර් ටික මේ පේන හරියකින් එල්ලන්න කියලා බොස් මහත්තයා කිව්වා."
"කිව්වා නම් උඹම එල්ලා ගනිං. මේ ඇදුම් පිටින් උඹ කියන්නේ අපිට ගස් බඩගාන්න කියලාද?"
අන්දුබයියා කොලුවාට කඩාගෙන පැන්නා. ඌත් අන්දුබයියාට බයවෙච්චි පාර බැනර් මිටියත් එතැන අතහැරලා මළගෙදර දිහාට දිව්වා. ටික වේලාවකින් මෙන්න අපේ දෙවැනි බොසාත් අපි දිහාට ආවේ අනෙක් උන් දෙන්නාවත් අරගෙනයි.

"අන්දුබයියා මේ බැනර් ටික එල්ලන්න හොද තැනක් කියන්න කෝ."
"මෙව්වා එල්ලන්න කෝ ලණු? කට්ටියට දෙන්නා දෙන්නා දෙපැත්තෙන් අල්ලාගෙන තමයි ඉන්න වෙන්නේ."
"හරි මම ලණු ගෙනත් දෙන්නම් ඔයා මළගෙදරට එන අයට පේන තැනක් බලලා තියන්නකෝ."
අන්දුබයියාගේ හැටි දන්නා දෙවැනි බොසා එහෙම කියලා පියන් කොලුවක් අරන් කඩයක් හොයාගෙන පාර පැත්තට ගියා.

"ගනිං අන්දුබයියේ ඔය බැනර් එකක් මෙන්න මෙතන එල්ලන්න."
"පකෝ ඔතැන හරියන්නේ නෑ. පාරට පෙන්නේ නෑ. මෙන්න මෙතැන උඩින් එල්ලාපං."
කොහු ලණු ගෙනාවට පස්සේ අපිත් මිනිහාට මුල් තැන දිගෙන බැනර් ටිකත් එල්ලා අහවර කළා. දැන් හවස පහටත් කිට්ටුකරලා අපේ ලොකු බොසා තාමත් නෑ.  ලොක්කා එක්ක එන්න හිතාගෙන නතරවුනු එකෙක් අපිට කොල් එකක් අරන් කියපි තාමත් බොසා එක්ක ඔපිස් එකේ ඉන්නේ පොඩි වැඩක් ඉවරකරලාම යනවා කිවිවා කියලා.  මිනිහාත් එක්ක එන්න හිටියා නම් අපිටත් වෙන්නේ මළගෙදර නයිට් එකක් අදින්න. අන්දුබයියා බැලුවේ ලොකු බොසා ආවානම් එයාගේ වාහනේ ආපහු කොළඹ එන්නයි. දැන් ඒකත් හබක්. කොළඹට එන්න ඉන්නේ කොළොම්පුරයයි අන්දුබයියායි විතරයි. පියන් කොලුවාත් ලොකු බොසා ආවාම එන්නම් කියලා මළගෙදරට සපෝට් එකටත් එක්ක නතරවුනා.

"බොසා එනකම් ඉන්නේ නැත්නම් උඹලාව කුරුණෑගල ටවුමෙන් දාන් යන්නම්. " 
මළගෙදරට ආයුබොවන් කියලා දෙවැනි බොසා නුවර යන්න ලෑස්තිවෙනගමන් කීවා. ඔන්න ඔහේ කියලා වෑන් එකට ගොඩවුන අපි දෙන්නාවත් කුරුණෑගල ටවුමෙන් හලාගෙන දෙවැනි බොසා ඉගිල්ලුනා.

"ඒයි අන්දුබයියේ කොහේද මේ යන්නේ? මේ බස් ස්ටෑන්ඩ් එක පැත්තට නොවෙයි නේද?"
"බජ්ජහුරස් බං මං මේ පොඩි පොට් එකක් හොයනවා."
"අයියෝ අර මළගෙදරින් දාලා එන්නයි නේ තිබුනේ."
"ඔය ලැට් හොයන් ගෙවල් අස්සේ රිංගන්න බෑ."
"හොයන්න බැරිනම් GM ලොක්කාගේ ගෙදරට එහා පැත්තේ පොල්වත්තට ගියානම් නිදහසේ හුළං වැදීගෙනම කරන්න තිබුනා නේ."
"මේ උඹ පොඩ්ඩක් හිටපං කෑගහන්නේ නැතිව."
මිනිහා රිචඩ් පොත් සාප්පුව පැත්තට පිස්සුවෙන් වාගේ ඇවිදන් යනවා.
"මේ මිනිස්සු ඉන්න අස්සේ කොහේද ලොක්කා තාප්ප? හොටලයකට ගිහිල්ලා දැම්මා නම් ඉවරයිනේ."
අන්දුබයියා ගාල කඩාගත්තු මී හරකාවාගේ හයියෙන් හයියෙන් පාර දිගේ ඇවිදින්න ගත්තා. කොළොම්පුරයාත් මිනිහා පස්සේ දුවනවා. අන්තිමේදි පොත් සාප්පුව ලඟ තිබුණ හදන කඩ කැල්ලක් අස්සට පැනලා අන්දුබයියාගේ බර හෑල්ලු කරගත්තා. කොළොම්පුරයා ඇගේ ලේ වතුරකරන් බලන් හිටියේ අනුන්ගේ කඩ කෑලි අස්සේ මුත්‍රා කරන එකාට නෙලන ජවනිකාවක සාක්කිකරුවෙක් වෙන්න ලැබෙන එකට.  

"ඒයි උඹට බඩගිනි නැද්ද?"
බජ්ජහුර හෑල්ලුකරන් කඩ කෑල්ල අස්සෙන් එළියට ආපු අන්දුබයියා ඇහැව්වා.
"බඩගිනියි තමයි කොහේද මාරි එකක් කාලා නෙස්කැෆේ බොන්න තිබුනු චාන්ස් එකත් නැති කළානේ."
"තෝ මාරියි නෙස්කැෆෙ බොන එක ගැනමයි ඈඩියාව. ඔච්චර මාරි කන්න පෙරේතද?"
"නෑ බිස්කට් කෑවානම් මෙහෙ හොටල් ගානේ රිංගන්න ඕනේ නැනේ. බියර් බීලා අතේ සල්ලිත් නෑ. බස්එකේ යන්න මදි වෙයිද මන්දා?"
"අනේ තොගේ සල්ලි. කොයි වෙලාවෙත් නෑ කියාගත්තු ගමන්. යකෝ සල්ලි තියෙන්නේ වියදම් කරන්න මිසක් පොදි ගහන්න නෙමෙයි."

අන්දුබයියා මංතුමාට බැන බැන කන්න හොටලයක් හොයන් එහෙට මෙහෙට කැරකෙනවා. අන්තිමේදි පැරකුම්බා විදියේ රන්සිළු හෝටලයට ගොඩවෙලා  අන්දුබයියාගේ ජාතික ආහාරය වුනු කොත්තුවක් අරන් දෙන්නාත් එක්ක බෙදාගෙන රසබැලුවා. අපරාදේ කියන්න බෑ කොන්තුවේ බිල ගෙව්වේ අන්දුබයියාම තමයි.  ප්ලෙන්ටි දෙකකුත් බීලා අහවරවෙලා දෙන්නාත් එක්ක ආයෙමත් පාරට වැටුනා. දැන් හවස හයටත් කිට්ටුවෙලා තාමත් කොළොම්පුරයා කුරුණෑගල ටවුමේ.
  
"මේ ලොක්කා අපිට කොච්චිය නැග්ගානම් ඉක්මණට කොළඹ යන්න තිබුනා. මෙහේ බස් එනකම් බලන් ඉන්නේ නැතිව ස්ටේෂමට යමුද? දැන් මේ වෙලාවට කොළඹට කොච්චියක් නැතිවෙන්න බෑ. ස්ටේෂම තියෙන තැන ඔයා දන්නවානේ?"

මගේ යෝජනාවට අන්දුබයියාත් කැමතිවුනා. දැන් දෙන්නාත් එක්ක ස්ටෙෂම බලා ගමනේ යෙදෙන්න ගත්තා. සියල්ල දන්න මිනිහා වගේ අන්දුබයියා යනවා යනවා නවතින පාටක් නෑ. ස්ටෙෂම මේ ලඟ ඇතියි හිතපු කොළොම්පුරයාත් අන්දුබයියා පස්සෙන් යනවා.
"මේ ලොක්කා ස්ටෙෂම තව දුරද?"
කිලොමිටරයක් විතර ඇවිදපු කොළොම්පුරයා ඇහැව්වා.
"නෑ මේ ලඟ."
කොළොම්පුරයාට ඉස්සරවෙලා ගිය අන්දුබයියා පාරේ ගිය මනුස්සයෙක්ගෙන් මොනවාදෝ අහලා ආයෙමත් ඇවිදින්න ගත්තා.
"ස්ටේෂම තියෙන තැනද ඇහැව්වේ?
නෑ මේ ලඟ ඉස්පිරිතාලයක් තියේනවාද ඇහැව්වා උඹව ඇඩ්මිඩ් කරන්න. කට වහන් වරෙන්."
තවත් කිලොමිටරයක් විතර ඇවිද්දාත් ස්ටේෂමක් තියා රේල් පාරක් වත් කොළොම්පුරයා දැක්කෙ නෑ. දැන් කුරුණෑගලට ඇඳිරියත් වැටිලා ඉවරයි තවම දෙන්නා ඇවිදිනවා.
"අන්දුබයියේ තව දුරද?"
"අර ලයිට් හරියේ."
මිනිහා ඈත තියෙන විදුලි බුබුලු ගොඩාක් දැල්වෙන හෝටලයක් පෙන්නුවා. ආපහු ඇවිදින්න ගත්තා. ඈතින් දැක්ක විදුලි බුබුලු තියෙන හොටල් කිහිපයකුත් පහුකරන් තවත් කිලෝමිටරයක් විතර ගියා එත් ස්ටේෂම නෑ. කොළොම්පුරයාට දැන් හොදටම මහන්සියි තොහෙට්ටුයි. ඒ අස්සේ සපත්තුවකින් කකුල කැපෙන්නත් අරගෙන.
"මේ ලොක්කා ඔයා දන්නවාද ස්ටේෂම තියෙන තැන. මේ යන්නේ හරි පාරේද? මෙහෙම ගියොත් කොළඹට ඇවිදින්න පුලුවන්වෙයි."  
මිනිහා කිසිම සද්දයක් දැන් නෑ. කතාකලත්  ඇහුනේ නැති ගානට අන්දුබයියා යනවා. මෙච්චර දුර ආපු එකේ ආයේ හැරිලා යන්නත් බෑ. දැන් කොහොම හරි ස්ටේෂමට ගිහින් කොළඹට යනවා යන දැඬි අධිෂ්ඨානයෙන්  කකුලත් නොන්ඩි ගසමින් කොළොම්පුරයාත් ඉදිරියට යනවා.
එන්න එන්නම අන්දුබයියා හා කොළොම්පුරයා අතර පරතරය වැඩිවෙලා ගිහින් කොළොම්පුරයාට වඩා මිටර් 150ක් විතර ඉදිරියෙන් අන්දුවා ඇවිදිනවා. දහඩියෙන් නෑවුනු කොළොම්පුරයාට මලේ උපරිම ඇවිල්ලා හිටියේ. මේ අතරේ ප්‍රධාන පාරෙන් හැරුනු අන්දුබයියා තවත් පාරක් ඔස්සේ යන්න ගත්තා. තවතා තිබූ තෙල් බවුසර් පෝලිමක් පසුකර ගියාට පස්සේ කුරුණෑගල තෙල් සංස්ථාවේ තොග ගබඩාවේ විශාල තෙල් ටැංකි කිහිපයකුත් කොළොම්පුරයාට දකින්න ලැබුනා. එතැන හිටිය කෙනෙකුගෙන් යමක් ඇසූ අන්දුබයියා කුඩා දෙවටක් අස්සෙන් රිංගුවා. ඔහු පස්සෙන් ගිය කොළොම්පුරයාට හැතැක්ම ගානක් ඇවිද ගිය පිනෙන් රේල් පාර දකින්න ලැබුනා. රේල් පාර දිගේ ආපස්සට ඇවිදආ පසුව කුරුණැගල දුම්රිය ස්ථානය දර්ශණය වුනේ ටවුමට වඩා ගොඩාක් ඈතින් ස්ටේෂම හදපු උන්ගේ මව්ගුණ සිහිකරමින්. නොන්ඩි ගසමින් ආපු කොළොම්පුරයා වඩා ඉදිරියෙන් හිටිය අන්දුබයියා ස්ටේෂමටත් ගොඩවෙලා අවසන්.

"ඒයි  කොළඹ කොච්චිය දැන් පැය භාගෙට කලින් ගිහිල්ලා ආයේ එකක් තියෙන්නේ රෑ එකලොහටලු."
එකේ හිටපු කාගෙන්දෝ අහලා අන්දුබයියා කිව්වා. කොළොම්පුරයාගේ ඉවසීමේ සිමාව පැන්නා.
"මේච්චර දුර මේ ස්ටේෂම තියෙනවා කියලා ඔයා දන්නේ නැද්ද?"
"නෑ මම දන්නවා."
"දන්නවා බම්බුව. දන්නවා නම් තොගේ ආච්චිගෙ අහවල් අවයවයකටද  මෙච්චර දුර පයින් ආවේ?"
"උඹනේ කිව්වේ කොච්චියේ යන්න ඕනේ කියලා ඉතිං මම ආවේ උඹට ස්ටේෂම තියෙන තැන පෙන්නන්න."
උපරිම කේන්තියෙන් හිටපු කොළොම්පුරයා අන්දුබයියාගේ හත්මුතු පාරම්පරාවේ අටවෙනියාව මතක් කර කර ආපහු ප්‍රධාන පාරට ඇවිත් කුරුණෑගල බසයක නැගලා ටවුමට ඇවිත් කොළඹ එන බසයකට ගොඩවුනා. දැන් මේක කියවන උන්නැහෑලාට පුලුවන්නම්  හත්මුතු  පරම්පරාවේ අටවෙනියා නම් කරලා අල කොමසාරිස් ඩ්‍රැස්කියා  හාමු මහත්තයාගේ  ඇන්ටික් පන්නයේ භාවිතයෙන් ඉවත්කරන ලද  මොටවූ උල්දත් යුගල දිනාගන්න.
අන්දුබයියා ඇවිදපු දුර

ගුගල් දෙයියාගේ සිතියම් පොජජෙන් බැලුවාම අන්දුබයියා කොළොම්පුරයාට කුරුණෑගල ස්ටේෂම පෙන්වන්න කිලෝමිටර් දෙකහාමාරක් පමණ  පයින් ඇවිද්දවලා තියේනවා.  අදටත් අන්දුබයියා පවසන්නේ එයා කුරුණෑගල  ස්ටේෂම තියෙන තැන දන්නා බවත් කොළොම්පුරයාව ඇවිද්දුවේ සරිර සවුක්කිය උදෙසා යහපත් පරමාර්ථයෙන් හා ස්ටේෂම තියෙන දුර පෙන්නීමට පමණක් බවයි.

අන්දුබයියාගේ ස්ටේෂන් පෙන්නීම මෙතැනින් නිමියේයැ.

.

අරගලයේ මරගලය (ශනිදා දහයට III)

  අරගලයේ මරගලය දැන් ජිවත්වෙන්න අමාරු නේද? උද්ධමනය ඉහල ගිහිල්ලාලු.  මේ වෙනකොට මේ අවුරුද්දට  ලයිටි බිල් තුන්පාරක් වැඩිකරා. ජල බිල් ගෑස් වියදම ...